Oqıǵa • 22 Jeltoqsan, 2025

Tis emhanasyndaǵy bala ólimi: Astana soty kinálige qatysty úkim shyǵardy

40 ret

kórsetildi

2 mın

oqý úshin

Astana qalasynyń qylmystyq ister jónindegi aýdanaralyq sotynda kámeletke tolmaǵan qyzdyń ólimine ákep soqqan kásibı mindetterdi tıisinshe oryndamaý deregi boıynsha aıyptalǵan J.-ǵa qatysty qylmystyq is qaraldy, dep jazady Egemen.kz.

Dana MYRZAQADIR

Tis emhanasyndaǵy bala ólimi: Astana soty kinálige qatysty úkim shyǵardy

Foto: Joǵary sot

2021 jyly týǵan E.-niń ata-anasy bala tisiniń aýyrsynýyna baılanysty jeke stomatologııalyq klınıkaǵa júgingen.Tekserý barysynda 11 tistiń zaqymdanǵany anyqtalǵan. Jalpy narkozben emdeýge daıyndyq kezinde em alýshyǵa tekserýler (jalpy qan taldaýy, koagýlogramma, júrektiń ÝDZ) taǵaıyndalǵan.

Qabyný prosesteriniń jáne teris zerthanalyq kórsetkishterdiń bolýyna qaramastan, J. jalpy sedasııa jaǵdaıynda uzaq ýaqytqa sozylǵan stomatologııalyq em júrgizgen. Em barysynda sevoflýran maskalyq rejımde 4,5 saǵat boıy qoldanylǵan. Al emdeýdi stomatolog A. júrgizgen.

«Anestezıologııalyq qamtamasyz etý kezinde sáıkes kelmeıtin tynys alý kontýry qoldanylyp, ókpeni jasandy jeldetý apparatymen sınhrondaý bolmaǵan. Bul ókpeniń mınýttyq ventılıasııasynyń tómendeýine, jedel gıpoksııaǵa, mıdyń isinýine soqtyryp, saldarynan em alýshy kóz jumǵan. Sottalýshynyń kinási jábirlenýshiler men kýálerdiń aıǵaqtary, sot-medısınalyq saraptamalardyń qorytyndylary, sondaı-aq qylmystyq istiń materıaldarymen dáleldendi», delingen Astana qalalyq soty taratqan habarlamada.

Prokýror sottalýshyny 4 jyl merzimge bas bostandyǵynan aıyrý jazasyn, sondaı-aq 3 jyl merzimge medısınalyq qyzmet kórsetýge baılanysty laýazymdardy atqarý quqyǵynan aıyrýdy taǵaıyndaýdy, alaıda Amnıstııa aktisin qoldaný arqyly negizgi jazany óteýden bosatýdy surady. Al aıyptalýshy kinásin moıyndamaǵan.

MÁMS aıasynda balalarǵa tis ımplanttary salynbaıdy

Jaza taǵaıyndaý kezinde sot sottalýshynyń 2 kámeletke tolmaǵan balasynyń baryn, jumys ornynan berilgen oń minezdemeni, buryn sotty bolmaǵanyn jeńildetetin mán-jaılar retinde eskerdi.

«Jasalǵan qylmystyń qoǵamdyq qaýiptilik sıpaty men dárejesin, jeńildetetin mán-jaılardyń bolýyn jáne aýyrlatatyn mán-jaılardyń joqtyǵyn, sondaı-aq jábirlenýshilerdiń pikirin eskere otyryp, sot J.-ǵa 2 jyl merzimge bas bostandyǵynan aıyrý jazasyn, sondaı-aq 3 jyl merzimge medısınalyq kómek kórsetý nemese medısınalyq qyzmet kórsetýge baılanysty laýazymdardy atqarý quqyǵynan aıyrý jazasyn taǵaıyndady», delingen Astana qalalyq soty taratqan habarlamada.

Dese de amnıstııa aktisin qoldaný negizinde J. taǵaıyndalǵan negizgi jazany óteýden bosatyldy.

Is boıynsha jábirlenýshi tarap azamattyq talap qoımaǵan. Úkim zańdy kúshine engen joq.