Oljas Bektenov sportshylardy qoldaý Úkimet jumysynyń basym baǵyttarynyń biri ekenin atap ótip, Ulttyq quramaǵa, onyń mamandary men bapkerler quramyna jeńiske jetý jolynda tabandylyq pen erik-jigerdiń úlgisin kórsetken úılesimdi ári nátıjeli jumystaryna alǵys aıtty.
Bıylǵy Sýrdlımpıada oıyndaryna 81 memleketten 3 myńǵa jýyq sportshy qatysty. Otandyq sportshylar segiz sport túrinen el namysyn qorǵap, 8 altyn, 4 kúmis pen 13 qola – barlyǵy 25 medal jeńip aldy. Nátıjesinde, elimizdiń Ulttyq quramasy jalpy komandalyq esepte 9-oryndy ıelendi.
«Memleket basshysy halyqqa Joldaýynda buqaralyq sportty damytýǵa, erekshe qajettilikteri bar azamattarǵa sport ǵımarattaryn salýǵa basa nazar aýdarý qajettigin aıtty. Sýrdlımpıada oıyndary elimizdegi sýrdlımpıada qozǵalysynyń turaqty damyp kele jatqanyn aıǵaqtaıdy. Bul – sporttyq uıymdardyń, jattyqtyrýshylardyń sondaı-aq, óz eńbegimen bolashaq jeńisterge berik negiz qalaıtyn sportshylardyń úılesimdi ári tynymsyz jumysynyń nátıjesi. Prezıdenttiń tapsyrmalaryn júzege asyrý sheńberinde Úkimet kásibı jáne buqaralyq sportty damytý, sportshylardy qoldaýǵa qatysty jumys júrgizýde, jańa ınfraqurylym nysandary salynyp jatyr. Júıeli ári ýaqtyly sharalar jalpy jetistikti arttyrýǵa, búkil sport salasyn odan ári damytýǵa múmkindik beredi», dedi O.Bektenov.
Marapattaý barysynda sýrdo dzıýdo sportshylarynyń jetistikteri atap ótildi. Olardyń joǵary deńgeıde óner kórsetýi elimizge 11 medal (5 altyn, 2 kúmis jáne 4 qola) alyp keldi ári Sýrdlımpıada oıyndarynyń jarqyn jetistikteriniń biri boldy. Komanda kóshbasshylarynyń qatarynda úsh dúrkin jáne eki dúrkin chempıon atanǵan Erkebulan Qanafın men Shadııar Qýandyq bar.
Al bıiktikke sekirýden ulttyq qurama qorjynyna altyn medal salǵan jeńil atletshi Faına Meırmanova 1,79 metrdi baǵyndyryp, oıynyń rekordyn ornatty. Erkin jáne grek-rım kúresinde chempıon atanǵan balýandar Andreı Samarın men Shadııar Pernesh te jalpy nátıjege aıtarlyqtaı úles qosty. Ústel tennısinde Qanat Konkýbaev, Danııar Eskendirov, Bıjan Tólebaev pen Abylaı Búrkitbaı qola júldege ıe boldy. Taekvondoda Aıan Abdrash, Aıjamol Abdıkatova men Aıda Makatova qola júldeger atandy.
Premer-mınıstr qol jetkizilgen barlyq nátıjeler eldegi sportshylardy daıarlaýdyń joǵary deńgeıi ári olardyń asa mańyzdy sporttyq syn-qaterlermen oıdaǵydaı kúresýge qabilettiligin kórsetetinin aıtty. Marapattalǵandardyń atynan jattyqtyrýshylar Serik Danııarov pen Maksım Rojkov sóz sóıledi.
«Barlyq sportshy men jattyqtyrýshynyń atynan el Prezıdentine sýrdlımpıada sportshylaryna kórsetken úlken qoldaýyna alǵys aıtqym keledi. Biz Sýrdlımpıada oıyndarynda 1997 jyldan beri óner kórsetip kelemiz. Elimizge altyn medaldy birinshi bolyp jeńip alǵanym esimde. Osy jyldarda óte úlken jumys atqaryldy. Japonııadaǵy oıyndar bizdiń elimiz úshin jetistikke toly boldy. Biz alǵash ret kóp medal ıelendik. Osy dástúrimizdi ári qaraı jalǵastyramyz», dedi Ulttyq Sýrdlımpıada quramasynyń jeńil atletıkadan jattyqtyrýshy M.Rojkov.
«Búginde aýqymdy jumystar atqaryldy. Biz osy Sýrdlımpıada oıyndarynda joǵary deńgeıde óner kórsettik, nátıjesinde osyndaı marapattar men jeńisterge qol jetkizdik. Elimizge, Prezıdentke úlken rahmet. Men ózimniń qola medalimdi Memleket basshysyna arnaǵym keledi», dedi ústel tennısinen ulttyq qurama komandasynyń aǵa jattyqtyrýshysy S.Danııarov.
