Jında óńirdiń 10 aýdany men 10 aýylyna saltanatty túrde JINMA 904A markaly 20 jańa traktordyń kilti berildi.
Baıqaý úzdikteri «Taza Qazaqstan» baǵdarlamasy aıasynda ınternetpen qamtý, abattandyrý men kógaldandyrýda kreatıvti ádis qoldaný, turmystyq qaldyqtardy tazalaý, halyqtyń áleýmettik jaǵdaıyn jaqsartý, ınfraqurylymdy, týrızmdi, saıabaqtar men jasyl jelekterdi damytý, úlgili aýyl, tártip pen zańdy, mádenı murany saqtaý, eldi mekender arasyndaǵy joldardyń sapasy jaqsartý, senbilik ótkizý, halyqty ekologııalyq is-sharalarǵa belsendi tartý, mańyzdy nysandarmen qamtamasyz etý, ınvestısııa tartý, ekonomıkalyq áleýetti nyǵaıtý, qoǵamdyq oryndardyń tazalyǵy, mesenattarmen belsendi jumys baǵyttarynda 20-ǵa jýyq nomınasııa anyqtaldy.
Saltanatty jıynǵa qatvsqan aımaq basshysy tazalyq mádenıetin qalyptastyrý ár turǵynnyń jaýapkershiligi ekenin aıtty.
«Aımaq ekonomıkasy, óneri men mádenıeti, ekologııasy men tazalyǵy – barshamyzǵa ortaq. Al tazalyq degenimiz – jylyna bir ret senbilikke qatysý emes, bul – bizdiń óńirde qalyptasýy tıis úlken mádenıet. Memleket basshysy Qasym-Jomart Toqaev bul jóninde «Qalalar men aýyldardyń sáýletti, saıabaqtar men aýlanyń taza bolýy, eń aldymen, basqaǵa emes, ózimizge kerek», dep aıryqsha atap ótken bolatyn. Týǵan jerimizdiń túlegeni, turǵan ortamyzdyń kirshiksiz bolǵany, eń aldymen, ózimizge kerek. Oblysymyzdyń tazalyǵy – ákimdik pen kommýnaldyq qyzmettiń ǵana emes, árbir azamattyń, árbir otbasynyń jaýapkershiligi. Búgingi marapat – sizderdiń birlikterińiz ben eńbekqorlyqtaryńyzdyń jemisi. Sizder óz aýyldaryńyzdy abattandyryp, kógaldandyrý arqyly ózgelerge úlgi kórsettińizder. Baıqaýǵa qatysyp, belsendilik tanytqan eldi mekenderge 20 jańa traktordyń kiltin tabystap otyrmyz. Tehnıkalar aýyldaryńyzdyń gúldenip, taza ári jaıly bolýyna qyzmet etedi dep senemin. Bul baıqaýdy dástúrge aınaldyryp, kelesi jyly da jalǵastyramyz. Tazalyq aksııasyna qatysqan qarapaıym azamattardy nazardan tys qaldyrmaı, marapattaıtyn bolamyz», dedi oblys ákimi.
Esterińizde bolsa oblys ákimi jyl basynda óńir turǵyndaryna arnaıy beıneúndeý jasap, jalpyóńirlik senbilikke belsendi qatysýǵa shaqyryp, jyl sońynda arnaıy baıqaý ótkizilip, jeńimpazdar anyqtalatynyn aıtqan edi.
Oblystyq baspasóz qyzmetiniń málimetinshe, bıyl óńirde «Taza Qazaqstan» baǵdarlamasy aıasynda aýqymdy jumys atqaryldy. Tazalyq naýqandaryna 349 myńnan astam turǵyn atsalysyp, 52 myń tonna qaldyq shyǵaryldy. Kógaldandyrý jumystarynyń nátıjesinde 70 myńnan astam kóshet egildi. Ǵaryshtyq monıtorıng arqyly anyqtalǵan 191 ruqsat etilmegen qoqys oryndary joıyldy.
