Foto: Aqorda
Qasym-Jomart Toqaevqa ekonomıkany ındýstrıalandyrý, mal sharýashylyǵy men aýyl sharýashylyǵy ónimderin óńdeý, egis alqaptaryn ártaraptandyrý, sý únemdeý tehnologııasyn engizý baǵytynda atqarylyp jatqan jumystar týraly baıandalyp, ınvestısııalyq pýl týraly málimet berildi.
Jyl basynan beri óńirge 599,2 mıllıard teńge ınvestısııa tartylǵan, ósim 33 paıyzdy quraǵan. Sońǵy eki jylda oblysta jalpy quny 242 mıllıard teńge bolatyn 56 ınvestısııalyq joba iske asyrylǵan.
Memleket basshysyna oblystaǵy jetekshi kásiporyndardyń jobalary kórsetildi. Olardyń qatarynda «Qazfosfat» seriktestiginiń mıneraldy tyńaıtqyshtar óndirý jáne YONGGANG CENTRAL IRON and STEEL kompanııasy salyp jatqan metallýrgııa zaýyty jobalary bar.
Sondaı-aq Jańatas qalasyndaǵy «EvroHım-Qarataý» aýqymdy ınvestısııalyq jobasynyń aralyq qorytyndysy usynyldy. Qazir kúkirt qyshqylyn óndiretin jańa zaýytty iske qosý aldyndaǵy tekserý jumystary júrgizilip jatyr. Alǵashqy ónim ishki naryqqa jóneltildi.
Aldaǵy ýaqytta paıdalanýǵa beriletin Shengtai Biotech Co.Ltd júgeri óńdeý zaýyty jóninde de baıandaldy. Shý aýdanyndaǵy bul jobaǵa 1,5 mıllıard dollar ınvestısııa salynǵan. Sonymen birge Baızaq aýdanyndaǵy Zhongkai Kazakhstan International Company qant zaýyty qurylysy jaıynda málimet berildi.
Prezıdent farmasevtıkalyq kásiporyndardyń qyzmetimen tanysty
Budan bólek, KAZ FMWORLD AGRICULTURAL MACHINERY kompanııasynyń ındýstrıaldyq aımaqta shyǵarylatyn aýylsharýashylyq tehnıkalary kórsetildi.
Eske salaıyq, búgin Memleket basshysy Jambyl oblysyna jumys saparymen bardy.
