Kópshilik kópten kútken Oqýshylar saraıy jóninde oblys ákimi jýyrda Astanada ótken brıfıngte, odan keıin oblystyq Bilim basqarmasynyń basshysy, ǵalym Baýyrjan Erdembekov te sóz qozǵap, «bıyl paıdalanýǵa beriledi» degen edi. «Apyraı, qalaı úlgerer eken» degen kúmán bolǵan. Biraq aıtylǵan ýáde oryndaldy. Nysannyń ashylýy Semeı jurtshylyǵyn erekshe qýanyshqa bóledi. «Adamnyń bir qyzyǵy bala degen» dep Hakim Abaı aıtqandaı, bala qýansa – ata-ananyń da kóńili tebirenbeı turmaıdy.
Oqýshylar saraıynyń ashylý saltanaty da aıryqsha ótti. Oǵan oblys ákimi Berik Ýálı, Oqý-aǵartý mınıstriniń orynbasary Shynar Aqparova, BI Group kompanııasynyń negizin qalaýshy Baýyrjan Isabaev, Y.Altynsarın atyndaǵy Ulttyq bilim akademııasynyń prezıdenti Ǵalııa Dáýletova jáne qala jurtshylyǵy qatysty. Ashylý rásiminde aımaq basshysy bul nysan óńirdiń bilim berý ınfraqurylymyn jańa deńgeıge kóteretin mańyzdy joba ekenin aıtty.
«Memleket basshysy Qasym-Jomart Toqaev «Bilim keleshegi: adal azamat, kásibı maman» taqyrybyndaǵy bıylǵy tamyz konferensııasynyń plenarlyq otyrysynda: «Qazir – bilim men ǵylymnyń zamany. Jahandaný dáýirinde ozyq bilimdi ıgergen, jańa tehnologııany meńgergen eldiń upaıy túgel bolady. Búgin sanaly urpaq tárbıeleı alsaq, erteń zaman kóshiniń basynda júremiz. Sondyqtan osy salany qoldaý memlekettik saıasattyń negizgi basymdyǵy bolyp qala beredi», dep aıryqsha atap ótken bolatyn. Bul nysan sporttyq-saýyqtyrý, kórkem-estetıkalyq, ǵylymı-tehnıkalyq, gýmanıtarlyq baǵyttary boıynsha balalar men jasóspirimderge úlken múmkindikteri bar damý baǵdaryn beretin biregeı ortalyq bolary sózsiz. Oqýshylar saraıy óńirimizdegi qosymsha bilim berý uıymdary úshin ádistemelik ortalyqqa aınalyp, pedagogter men oqýshylarǵa arnalǵan túrli is-sharalar ótkiziletin bolady. Memleket basshysy arnaıy tapsyrmasymen qurylysy bastalǵan jańa Oqýshylar saraıy Abaı oblysy qurylǵannan bergi salynyp bitken tuńǵysh áleýmettik nysan bolyp otyr. 2023 jyly bastalǵan bul joba Premer-mınıstrdiń 2024-2026 jyldarǵa arnalǵan jol kartasyna engizilgen. Alaıda qarjylyq qıyndyqtarǵa baılanysty qurylys toqtap qalǵan bolatyn. Bıyl Úkimettiń qoldaýymen 7,6 mıllıard teńge qarajatty bólinip, qurylysy qaıta jandandy. Búgin mine elimizdegi 10-ynshy Oqýshylar saraıynyń ashylýyna jınalyp otyrmyz. Oqýshylar saraıynyń ornalasqan jerine baılanysty, balalardyń qaýipsizdigi men yńǵaıly kirip-shyǵýy úshin arnaıy jaıaý júrginshiler kópirin salýdy josparlap otyrmyz. Qazir atalǵan kópirdiń jobalyq-smetalyq qujattary ázirlený ústinde. Semeı qalasynda qazir qyzmet atqaryp turǵan Jastar saraıy 1991 jyly ashylǵan, odan keıin mundaı qosymsha bilim berý nysany ashylmaǵan. Oqýshylar saraıy – balalardyń shyǵarmashylyǵyn, zııatkerlik áleýetin, kóshbasshylyq qasıetterin damytatyn, bilimdi ómir saltyna aınaldyratyn mańyzdy keńistik. Osy ıgi iske úles qosqan barlyq áriptesterge, seriktesterge alǵys aıtamyn. Jańa bilim ordasy balalarymyzdyń armanyna jol ashyp, elimizdiń bolashaǵyna qyzmet etsin!», dedi oblys ákimi.
Osylaısha, oblys ákimi ásem ǵımarattyń qalaı salynǵanyn, onyń qandaı mańyzy baryn aıtyp berdi. Sonymen birge saltanatty jıynda Oqý-aǵartý mınıstriniń orynbasary Shynar Aqparova jańa nysannyń óńir oqýshylaryna bereri mol ekenin jetkizdi.
«Júıeli memlekettik qoldaýdyń nátıjesi Abaı oblysynyń bilim salasyndaǵy aıqyn jetistikterinen kórinedi. Bıyl osy óńirdiń oqýshylary halyqaralyq jáne zııatkerlik baıqaýlarda 19 júldeli orynǵa, al respýblıkalyq deńgeıde 167 júldeli orynǵa ıe boldy. Sondaı-aq aýyl mektepteriniń 9-11 synyp arasyndaǵy respýblıkalyq olımpıadada 16 júldeli oryn ıelendi. Bul jetistik bala, ata-ana jáne muǵalimniń ózara birliginiń nátıjesi. Barshańyzdy Oqýshylar saraıynyń saltanatty túrde ashylýymen quttyqtaımyn», dedi mınıstrdiń orynbasary.
Bilim basqarmasynyń málimetinshe, ǵımarattyń qurylysy 2023 jyly bastalǵan. Nysannyń jalpy aýdany – 9 800 sharshy metr. Saraı 500 balaǵa arnalǵan, aýysymmen 1 500 oqýshyǵa deıin qabyldaı alady.
Berik Ýálı halyqaralyq olımpıada júldegerlerine stıpendııa taǵaıyndady
Zamanaýı úlgide salynǵan ǵımarattyń syrtqy kórinisi de kóz tartady. Al ishiniń saltanatyn sanap taýysa almaısyz, balaǵa kerektiniń bári osy jerden tabylady. Máselen, eki basseın, horeografııa, shyǵys jekpe-jegi, fıtnes, ústel tennısi zaldary, ústel oıyndary, vokal jáne aspaptyq mýzyka, dybys jazý, músin jáne ART stýdııalary, horeografııa, akterlik sheberlik, sáýlet óneri, sondaı-aq VR tehnologııalaryn qoldanatyn oıyn túrindegi ımıtasııalyq oqytý kabınetteri jumys istep tur. Ǵylymı-tehnıkalyq baǵyt aıasynda avıamodeldeý, jańartylatyn energııa kózderi, akvaponıka jáne gıdroponıka, neırozerthana jáne neırorobototehnıka, 3D-basyp shyǵarý jáne modeldeý (M-TECH), baǵdarlamalaý, vıdeografııa jáne kıno, jaratylystaný ǵylymdary boıynsha zerthanalar, sondaı-aq astronomııalyq observatorııasy bar.
Bala túgil úlken adamnyń ózi bir kirse, shyqqysy kelmeıtindeı. Ras, biz astronomııalyq observatorııa degendi kitaptan ǵana oqyp, bilgen edik. Al ǵımarattyń qyzyǵy onymen bitpeıdi, gýmanıtarlyq baǵytta medıa-ortalyq pen kóptildi lıngvıstıka kabıneti (qazaq, orys, aǵylshyn jáne basqa da shet tilderi) bar. Balalardyń jan-jaqty damýyna jaǵdaı jasaý maqsatynda psıhologııalyq qoldaý baǵytynda sensorlyq bólme men sóıleý tilin damytý kabıneti jáne ashylǵan. Sonymen qatar tarıhı-ólketaný baǵytynda kovorkıng aımaǵy bar ınteraktıvti kitaphana men ólketaný klýby qyzmet kórsetedi.
