Munda Qazaq handyǵynyń jazba muralary, Sın patshalyǵyna joldanǵan dıplomatııalyq qujattar, Qazaq handyǵynyń Sın eline elshi attandyrý úderisi, sondaı-aq dıplomatııalyq qujattardyń translıterasııasy, transkrıpsııasy, qazirgi qazaq tilindegi aýdarmasy jan-jaqty qamtylǵan.
Kitaptyń tusaýkeserinde avtor eńbektiń mańyzdylyǵyna toqtaldy: «Tarıhı derektaný ǵylymynyń zertteý nysany – yqylym zamannan búginge deıin jetken tarıhı qundylyqqa ıe barlyq jazba derekter. Sol derekterdiń mańyzdy bóligi – muraǵat qujattary. Qazaqqa qatysty muraǵat materıaldary sany jaǵynan kóp bolmasa da, ár dáýirde, ár óńirde, túrli tilde jazylyp, saqtalǵan. 1757 jyly Qazaq handyǵy men Sın patshalyǵy arasynda resmı dıplomatııalyq qarym-qatynas ornap, ózara hat almasý kúsheıe tústi. Kitap dál osy tarıhı kezeń men qujattarǵa negizdelip jazylǵan. Bul eńbek Eýrazııa ulttyq ýnıversıtetiniń professor-oqytýshylar quramy men stýdentterine paıdaly bolady dep senemin», – dedi kitap avtory Dúısenáli Ábdiláshimuly.
Tusaýkeserde Qazaq handyǵy dáýirindegi dıplomatııalyq qujattardyń tarıhı máni, Sın patshalyǵymen bolǵan saıası baılanys, sondaı-aq qazaqtyń jazý mádenıeti men derektanýlyq zertteý máseleleri talqylandy. Kitaptaǵy jańa arhıvtik derekterdiń otandyq tarıh ǵylymyna qosatyn úlesi, qundy qujattardyń halqymyzdyń tarıhyn, memlekettik basqarý júıesin jáne syrtqy saıası baılanystaryn qaıta zerdeleýde, sondaı-aq qazaqtyń jazý mádenıetin tereń zertteýde teńdesi joq derekkóz ekeni aıtyldy.
Atalǵan eńbek – avtordyń kóp jyldar boıy júrgizgen júıeli ǵylymı zertteýiniń nátıjesi. Osy sala boıynsha el ishinde de, shetelde de tuńǵysh ret daıyndalǵan, mazmuny tereń, derektik negizi berik ǵylymı monografııanyń mańyzy zor. Zertteý aıasynda Qytaı muraǵat qorlarynda saqtalǵan qazaq handary men sultandarynyń 160 dıplomatııalyq haty, sondaı-aq Sın patshalyǵynyń 6 patsha jarlyǵy ǵylymı aınalymǵa engizildi. Sonymen qatar 31 tarıhı qujattyń faksımılesi berilip, tól jazba muramyzdyń mazmuny, tili men jazý mádenıeti jan-jaqty taldandy.
