Foto: istokphoto.com
Merekeniń tynysh, qaýipsiz ári oqys oqıǵalarsyz ótýine baǵyttalǵan bul sharalar 20 jeltoqsannan 3 qańtarǵa deıin jalǵasady. Atalǵan is-sharalardyń basty maqsaty – qoǵamdyq jáne jol qaýipsizdigin qamtamasyz etý, quqyq buzýshylyqtardyń aldyn alý jáne qoǵamdyq tártipti saqtaý.
Polısııa basqa da qyzmettermen birlesip, kóshelerde, aýlalarda, saýda oryndarynda jáne adamdar kóp jınalatyn jerlerde patrýldeýdi kúsheıtti.
Jasóspirimder men jastar arasynda túsindirý jumystary júrgizilip jatyr, jol qozǵalysy erejeleriniń, kóshi-qon zańnamasynyń saqtalýyna baqylaý jasalyp jatyr, sodaı-aq alkogoldiń, esirtkiniń jáne ózge de tyıym salynǵan zattardyń zańsyz aınalymyna tosqaýyl qoıyldy. Dál jańa jyl qarsańynda otshashý men petardalardy durys qoldanbaýdyń saldarynan jaraqat alý, órt shyǵý jáne jazataıym oqıǵalar sany kúrt artady.
Osyǵan baılanysty polısııa órtke qarsy qyzmetpen birlesip, pırotehnıkalyq buıymdardyń aınalymyn baqylaý boıynsha jyl saıyn arnaıy is-sharalar ótkizedi. Bıyl tórt myńnan astam tekserý júrgizilip, shamamen bes júz zań buzýshylyq anyqtaldy, segiz myńnan astam sertıfıkattalmaǵan ári qaýipti pırotehnıkalyq ónim tárkilendi.
«Pırotehnıkalyq buıymdardy tek arnaıy jáne resmı saýda oryndarynan ǵana satyp alý qajet. Sáıkestik sertıfıkatynyń bolýyna nazar aýdaryńyzdar, qoldaný nusqaýlyǵyn muqııat oqyp shyǵyp, ónimniń jaramdylyq merzimin mindetti túrde tekserý qajet», delingen habarlamada.
Merzimi ótken pırotehnıkany qoldanýǵa, sondaı-aq ony balalardyń eresekterdiń baqylaýynsyz paıdalanýyna qatań tyıym salynady.
