Benzın men dızel otynyn óndirý kólemi óspek

Buıyrtsa, kelesi jyldan keıin otandyq munaı óńdeý zaýyttarynyń qýaty artyp, sapasy jaqsaryp elimizdi benzın men dızel otyny ımportyna táýeldilikten qutqarady. Bul jóninde Energetıka mınıstri Vladımır Shkolnık Ortalyq kommýnıkasııalar qyzmetinde bolǵan baspasóz máslıhatynda aıtty. Eldegi munaı óńdeý zaýyttaryn jańǵyrtý jumystary 2016 jyldan soń tolyǵymen aıaqtalyp, bar qýatymen jumys isteıdi eken. Qazirgi kúnde Atyraý munaı óńdeý zaýytynda tehnologııany jańǵyrtý jáne qaıta qurý jumystary jalǵasyp jatyr. «Aýqymy keń úzdik tehnologııa iske qosylǵan soń, zaýyttarda munaı-hımııa jáne janar-jaǵarmaı boıynsha joǵary oktandy benzın shyǵarýǵa tolyq múmkindik bolady. Jobanyń jalpy quny 1 mlrd. 098 mln. dollar. Onyń 1 mlrd. 064 mln. dollary – Qazaqstannyń Damý bankiniń qarajaty. Keshen paıdalanýǵa berilgennen keıin, ol jerde 357 jumys orny ashylmaq. Munymen birge, munaıdy tereńdete óńdeý kesheni de salynyp jatyr. Sonda jobanyń jalpy quny 2 mlrd. 23 mln. dollar bolǵaly tur. Búginde onyń qurylys-montaj jumystary júrgizilýde. Bul jumystarǵa shamamen 3,8 myńnan astam adam jumysqa tartyldy. Sóz bolǵan nysan 2016 jyldyń sońyna qaraı tolyq salynyp bitedi degen úmit bar», dedi ol. Zaýytty paıdalanýǵa bergennen keıin, shıki munaıdy óńdeý kólemi jylyna 5 mln. tonnadan 5,5 mln. tonnaǵa deıin ósedi eken. О́ndiriletin janar-jaǵarmaı sapasy eýro-4, eýro-5 standartyna saı bolady. Bularmen birge, zaýytta qosymsha quny joǵary munaı ónimderi de shyǵarylady. Olar –jylyna 132 myń tonna shyǵarylatyn benzol jáne 500 myń tonna óndiriletin paraksılol. Al, Shymkent munaı óńdeý zaýytyn jańartyp-jańǵyrtýǵa 1 mlrd. 829 mln. dollar qarastyrylypty. Ony qarjylandyrý «QazMunaıGaz» kompanııasy men qaryz aqshalardyń negizinde júzege asyrylatyn kórinedi. Osy kezge deıin ınvestısııanyń 5 paıyzy jumsalyp ta qoıypty. «Bul joba da 2016 jyly paıdalanýǵa beriletin bolady. Qaıta qurýdan keıin, Shymkent munaı óńdeý zaýytynyń ónimdiligi 6 mln. tonnadan artady. Ondaǵy munaıdy tereń óńdeý isi 90 paıyzǵa jýyqtaıdy dep aıta alamyn. Sóıtip, óndirilgen suıyq otyn eýro-4 jáne eýro-5 standartyna jaýap beretin bolady. Sońǵy zaýyt – Pavlodar munaı óńdeý kásipornyn jańǵyrtýǵa 1 mlrd. 218 mln. dollar jumsalady. Ol paıdalanýǵa 2016 jyldyń sońyna taman beriledi. Zaýyt jańa tehnologııalarǵa ıe bolǵannan soń munaı óńdeý kólemi 7 mln. tonnaǵa jetip, bul jerde de eýro-4 pen eýro-5 standartyndaǵy janar-jaǵarmaılar shyǵarylady. Sonymen, otandyq munaı óńdeý zaýyttaryn jańartý aıaqtalǵannan soń, munaıdy qaıta óńdeý kólemi 29,4 paıyzǵa artady, ıaǵnı 14 mln. 297 myń tonnadan 18,5 mln. tonnaǵa jetedi. Jekelep kórseter bolsaq, suranysqa ıe AI-92 markaly benzındi óndirý 21 paıyzǵa, al AI-95 jáne AI-98 benzıni boıynsha 0,7-den 10 paıyzǵa deıin arta túsedi. Elimiz osylaısha 2016 jyldan keıin óz naryǵyn tolyǵymen sapaly benzınmen jáne dızel otynymen qamtamasyz etedi. Sóıtip, ony ózge elderden ımporttaý qajet bolmaıdy», dedi V.Shkolnık. Nurbaı ELMURATOV, «Egemen Qazaqstan».