Fýtbol klýbynyń baspasóz qyzmeti jergilikti komandanyń eki legıonermen qoshtasatynyn málimdedi.
Eki legıonerdiń biri – Joel Ngandý Kaıamba. Kongo Demokratııalyq Respýblıkasynyń fýtbolshysy jartylaı qorǵaýshy pozısııasynda oınady.
Ol Qazaqstandaǵy eń kóp drıblıng avtorynyń biri retinde tanymal bolǵan edi. Fýtboldaǵy mansabyn óz elindegi «Sharks» komandasynda bastaǵan. Keıinnen Chehııanyń «Glınsko», «Prshıbram» jáne «Vıktorııa» (Plzen) klýbtarynda dop tepti. Budan soń Túrkııanyń «Samsýnspor» men «Bolýspor» klýbynda oınap, byltyrǵy maýsymdy «Atyraýda» ótkizdi.
Joel Ngandý Kaıamba bıyl lıvııalyq «Ábý Sálım» klýbynda oınady. Al maýsym aıynda «Atyraý» fýtbol klýbyna qaıta oralyp, úsh oıynǵa qatysty.
Ekinshi legıoner – Gana eliniń fýbolshysy Abdýl Rashıd Abýbakar. Jergilikti komanda quramyna bıylǵy jazda «Ordabasy» klýbynan aýysyp, alańǵa segiz ret shyqty. 
«Legıonerler «Atyraý» fýtbol klýbymen kelisimsharttyń aıaqtalýyna baılanysty qoshtasady. Qazir klýb barlyq oıynshy, onyń ishinde legıoner fýtbolshylar aldyndaǵy qarjylyq mindettemelerin tolyq oryndady. «Atyraý» fýtbol klýbynda jalaqy qaryzy joq», dep habarlady klýbtyń baspasóz qyzmeti.
