Foto: Kóliktegi polısııa departamenti
Aldymen áýejaıdyń órttiń aldyn alý toby termınaldarda josparly tekserý júrgizedi. Mamandar kútý zaldaryn, saýda núktelerin, qyzmettik bólmelerdi aralap shyǵady. Ásirese jalǵa alýshylarǵa – dúkender men dámhanalarǵa erekshe kóńil bólinedi. Mereke qarsańynda munda órt qaýipsizdigi talaptarynyń saqtalýy qatań baqylaýǵa alynǵan.
«Qazir barlyq jerde shyrshalar, gırlıandalar men túrli bezendirý elementteri qoıylady. Biz olardyń sertıfıkattalǵanyn, elektr qurylǵylarynyń órt qaýipsizdigi talaptaryna sáıkestigin tekseremiz. Sondaı-aq merekelik áshekeıler adamdardyń erkin qozǵalysyna jáne evakýasııa joldaryna kedergi keltirmeýi tıis», dedi áýejaıdyń órt qaýipsizdigi qyzmetiniń bas ınjeneri Vıacheslav Popov.
24.kz-tiń habarlaýynsha, avıasııalyq qaýipsizdik qyzmeti de kúsheıtilgen rejımge kóshti.
«Bir aýysymǵa qosymsha shamamen 140 qyzmetker tartylady. Jolaýshylardyń júgi muqııat tekseriledi», dedi avıasııalyq qaýipsizdik qyzmetiniń ınspektory Shyńǵys Sovet.
Budan bólek, áýejaıda jolaýshylar arasynda qosymsha túsindirý jáne profılaktıkalyq jumystar júrgizilip jatyr. Mamandar mereke kúnderi qaýipsizdik talaptaryn saqtaý qajettigin eskertedi jáne jolaýshylardan tártipke muqııat bolýdy suraıdy.
