Foto: Qorǵanys mınıstrligi
Jaqsy nátıjeler
Qorǵanys mınıstri avıasııa general-leıtenanty Dáýren Qosanov atalǵan komıtettiń jumysyn oń baǵalady. Ol Almatyda áskerı-sport kolledjiniń ashylýyn, áskerı qyzmetshiler arasynda qazaq kúresinen alǵashqy álem chempıonatynyń ótkizilýin, Ulttyq olımpıadalyq komıtetpen, Oqý-aǵartý mınıstrligi janyndaǵy Dene shynyqtyrý jáne sport ortalyǵymen jáne Mońǵolııanyń qoıan-qoltyq urys qaýymdastyǵymen memorandýmdarǵa qol qoıylýyn atap ótti.
«Búgin biz naqty nátıjelerdi kórip otyrmyz. 2025 jyldyń ózinde AOSK-nyń sportshylary shamamen 500 medal oljalasa, onyń 234-i altyn, 140-y kúmis. Bul – bapkerler quramynyń joǵary kásibıliginiń, daıyndyqtyń saýatty uıymdastyrylýynyń jáne sportshylarymyzǵa tán áskerde shyńdalǵan minezdiń kórsetkishi» dedi D.Qosanov.
Marapattaý rásimi
Joǵary sporttyq jetistikteri úshin «Qazaqstan barysy» týrnıriniń jeńimpazy Erasyl Qajybaevqa jáne Parıjdegi Olımpıada oıyndarynyń qola júldegeri Islam Sátpaevqa alǵashqy ofıserlik «leıtenant» áskerı ataǵy berildi.
«El qorǵany» vedomstvolyq medalimen Qorǵanys mınıstrligi Sport komıtetiniń bas jattyqtyrýshysy podpolkovnık Murat Bıjanov, taekvondodan álem chempıony Batyrhan Tóleýǵalı, bokstan álem chempıony Angelına Lýkas jáne 600 shaqyrymdyq ýltramarafondy eńserip, Qazaqstan rekordyn ornatqan serjant Raýan Ábilhanov marapattaldy.
«Qazaqstan Respýblıkasy Qarýly Kúshteriniń úzdigi» tósbelgisi qazaq kúresi, taekvondo, kıkboksıng jáne sambodan álem chempıondary men júldegerleri Batyrhan Qýandyqovqa, Nurdáýlet Baqtybaıulyna, Nurjan Týmýrzaevqa, Aıdar Beskempirge tabystaldy.
Sport komıteti basshylyǵynyń sheshimimen álem chempıonattarynda jeńiske jetken jáne júldeli oryndarǵa ıe bolǵan úzdik sportshylar aqshalaı syıaqymen kótermelendi.
Quqyq qorǵaý jáne kúsh qurylymdary arasynda ótken sambo chempıonatyndaǵy jeńisi úshin qatardaǵy jaýynger Sanjar Nurseıit Qorǵanys mınıstri atynan gramotamen marapattaldy. Sonymen qatar ásker sportyn damytýǵa belsendi atsalysyp júrgen memlekettik organdardyń, sport federasııalarynyń, buqaralyq aqparat quraldarynyń jáne qoǵamdyq uıymdardyń ókilderine alǵys hattar tabystaldy.
