Sýretti túsirgen – Mádı ǴUBAIDÝLLIN
Jańa ortalyqta plastıkalyq, rekonstrýktıvti gınekologııa, jambas túbi jáne aǵzany saqtaýǵa arnalǵan operasııalar jasalady. Sondaı-aq ýrogınekologııa, ish qýys hırýrgııasy men bedeýliktiń aldyn alýǵa arnalǵan em-shara júrgiziledi. О́ńirde tuńǵysh ret mıoma men endometrıoz kezinde radıojıilik ablıasııasy qoldanyla bastady.
– «Uniserv medical center» klınıkasy Oral qalasynda 2019 jyly ashyldy. Klınıka ulttyq akkredıtteýden sátti ótip, medısınalyq ortalyqqa joǵary sanat berildi. Bul sanat elimizde birdi-ekili medortalyqta ǵana bar. Munda 3000-nan astam medısınalyq qyzmet kórsetiledi. Turǵyndar MÁMS aıasynda da em-dom alady. Ortalyqqa kelgen adam bir jerden barlyq dárigerge qarala alady. Jalpy, rekonstrýktıvti gınekologııa ortalyǵyn ashý – joǵary sanatty akýsher-gınekolog dáriger Erlan Muqanovtyń ıdeıasy. Búgin mine, óńirdegi qyz-kelinshekterdiń densaýlyǵyna qyzmet etetin záýlim ortalyqqa qol jetkizdik, – dedi «Uniserv» kompanııalar toby baqylaý keńesiniń tóraǵasy, II dárejeli «Barys» ordeniniń ıegeri Nurǵazy Sátbaev.
Klınıka shveısarııalyq jabdyqtarmen, halyqaralyq standarttarǵa saı eýropalyq quraldarmen qamtamasyz etilgen. 15 oryndyq stasıonar, operasııalyq blok, jan saqtaý bólmesi bar. Gınekologııa bólimshesiniń meńgerýshisi, medısına ǵylymdarynyń kandıdaty, akýsher-gınekolog, endohırýrg Erlan Muqanovtyń aıtýynsha, radıojıiliktik ablıasııa mıomany, endometrıozdy emdeýdiń zamanaýı ádisi. Ol ýltradybystyq baqylaýmen terini ınemen tesý arqyly jasalady. Operasııaǵa 20-30 mınýt, ári ketkende bir saǵat ýaqyt ketedi, tiliksiz jasalady, jatyrdy alyp tastamaıdy. Ońaltý merzimi de qysqa, naýqas erteńine úıine orala alady. Áıeldiń reprodýktıvti fýnksııasy saqtalady.
– Qazirdiń ózinde 16 naýqasqa operasııa jasaldy. Jatyr aýrýlaryn mundaı jolmen emdeý bolashaqta ana bolǵysy keletin qyz-kelinshekterge qaýipsiz. Búginde 15-18 jastaǵy qyzdarda da bul dert kezdesetinin eskersek, ortalyq qyzmetiniń barynsha ózekti ekenin kóremiz, – deıdi Erlan Tilegenuly.
Batys Qazaqstan oblysy
