Qaraǵandy oblysynda jol qozǵalysy mádenıetin qalyptastyrý jáne qaýipsizdikti arttyrý maqsatynda «Úlgili júrgizýshi» naýqany uıymdastyryldy. Is-shara aıasynda patrýldik polısııa qyzmetkerleri qoǵamdyq tártipti saqtap, joldaǵy «júgensiz» júrgizýshilerge úlgi kórsetip júrgen azamattardy toqtatyp, alǵys bildirip, syılyq tabystady.
Osyndaı qurmetke ıe bolǵandardyń biri – otyz jyl boıy kólik tizgindep júrip, birde-bir ret jol erejesin buzbaǵan Svetlana Shvachkına. Ol osy ýaqyt ishinde aıyppul arqalamaǵan, birde-bir jol-kólik oqıǵasyna qatyspaı, ereje de buzbaǵan. Polısııa qyzmetkerleri mundaı kórsetkishtiń sırek ekenin atap ótti.
Svetlana Shvachkına – tek tájirıbeli júrgizýshi ǵana emes, qoǵam belsendisi ári ustaz. Búginde ol Qaraǵandy qalasyndaǵy №95 mektep gımnazııasynda jas ınspektorlar úıirmesin basqaryp, oqýshylardyń jol qaýipsizdigine qatysty bilimin arttyrýmen aınalysady.
«Qazir qala joldarynda kólik kóp, qarbalas ta az emes. Osyndaı jaǵdaıda eń bastysy – sabyr men jaýapkershilik. Joldaǵy mádenıet adamnyń ishki mádenıetin kórsetedi. Sondyqtan da balalarǵa qaýipsizdik negizderin mektep qabyrǵasynan bastap túsindirý óte mańyzdy», deıdi úlgili júrgizýshi Svetlana.
Onyń aıtýynsha, jas ınspektorlar úıirmesine qatysatyn balalar jol belgilerin tanyp-bilip qana qoımaı, arnaıy is-sharalarǵa qatysyp, polısııa qyzmetkerlerimen birlesip, jolda júrý erejelerin nasıhattaýǵa atsalysady. Bul – bolashaqta sanaly, tártipti júrgizýshilerdiń qalyptasýyna yqpal etetin bastama.
Qaraǵandy oblystyq polısııa departamentiniń dereginshe, aksııa bastalǵaly beri tek oblys ortalyǵynda 100-ge jýyq júrgizýshige dál osyndaı qurmet kórsetilgen. Jol saqshylary júrgizýshilerdi toqtatyp, olardyń jol erejesin saqtaý deńgeıin tekserip qana qoımaı, qaýipsizdik jóninde keńes berip, alǵyshattar tabystaýda.
Izgi joba «Qaýipsiz jol» jedel-profılaktıkalyq is-sharasy aıasynda uıymdastyrylǵan. Onyń basty mindeti – jol-kólik oqıǵalarynyń aldyn alý, qala kóshelerindegi tártipti nyǵaıtý jáne júrgizýshilerdiń nazaryn jol qaýipsizdiginiń mańyzyna aýdarý.
«Erejeni qatań saqtańyzdar! Jyldamdyqty asyrý – úlken qater. Qarsy baǵytqa shyǵý – kóptegen qaıǵyly jaǵdaıdyń sebebi. Jolda ózińmen birge otyrǵan jolaýshylardyń ǵana emes, beıtanys adamdardyń ómiri de seniń sheshimińe baılanysty», dedi tártipti júrgizýshi.
Patrýldik polısııa batalony komandıriniń orynbasary Suńǵat Abylqas mundaı is-sharalar júrgizýshilerdiń tártip saqtaýǵa degen yntasyn arttyryp qana qoımaı, qaladaǵy jalpy jol mádenıetiniń jaqsarýyna yqpal etetinin atap ótti.
Statıstıkaǵa súıensek, jyl basynan beri óńir joldarynda mas kúıinde kólik basqarý jáne medısınalyq kýálandyrýdan ótýden bas tartýdyń 220 deregi tirkelgen. Sondaı-aq 73 júrgizýshi jalǵan memlekettik nómir qoldanǵan, 53 adam kólik júrgizý quqyǵynan aıyrylsa da rólge otyrǵan. Buǵan qosa zańsyz jolaýshy tasymaldaýdyń 53 faktisi, joldyń qarsy baǵytyna shyǵýdyń 133 deregi anyqtalǵan.
Júrgizýshi qaýym mundaı ıgi bastama kópshilikke oı salyp, ásirese jas býynnyń jol qozǵalysyna degen kózqarasyn jaqsartatynyna senedi. Aksııa jyl sońyna deıin jalǵasady. Polısııa árkez halyqty jolda saq bolýǵa shaqyrady. Jol qaýipsizdigi – kezdeısoqtyqqa jol bermeıtin asa jaýapty sala, al Svetlana Shvachkına sııaqty júrgizýshiler – shyn mánisinde de qaýipsiz joldyń kepili.
Qaraǵandy oblysy
