foto: «AES Shúlbi GES» AQ fotomuraǵat
Shúlbi SES Semeı qalasynan 70 shaqyrym jerde ornalasqan jáne Ertis kaskadyndaǵy sý elektr stansııalarynyń úshinshi býyny sanalady. Ornatylǵan qýaty — 702 MVt. Bul kórsetkish boıynsha ol Qazaqstandaǵy eń iri sý elektr stansııasy bolyp qala beredi. Alaıda basty qundylyq — stansııanyń úzdiksiz jumysyn qamtamasyz etip otyrǵan adamdar.
Stansııa qurylysy 1976 jyly bastalyp, 1987 jyly alǵashqy gıdroagregat iske qosyldy. Osy ýaqyttan bastap Shúlbi SES energetıkalyq ınfraqurylym nysanymen qatar, kásibı áýletter qalyptasqan, tájirıbe men bilim sabaqtastyǵy ornyqqan eńbek ordasyna aınaldy. Qazirgi tańda munda 204 qyzmetker eńbek etedi.
Ujymnyń negizin gıdroagregat mashınısteri, elektrmonterler, jabdyq jóndeý slesarlary, ınjenerler, eńbek qaýipsizdigi jáne avtokólik qyzmetiniń mamandary quraıdy. Olar kúrdeli jabdyqtardyń senimdi jumysyn qamtamasyz etip, tehnıkalyq parametrlerdi baqylaıdy, josparly jáne apattyq jóndeý jumystaryn júrgizedi, qaýipsizdik pen ekologııalyq talaptardyń saqtalýyna jaýap beredi.
Shúlbi SES-tegi jumysshy mamandyq — tek mindet atqarý emes, joǵary jaýapkershilik pen turaqty kásibı damýdy talap etetin eńbek. Qyzmetkerler júıeli túrde oqýdan ótip, nusqamalar men attestasııadan ótedi, jańa tehnologııalardy meńgeredi. О́ndiriste qaýipsizdik mádenıetine erekshe mán berilgen: zamanaýı eńbekti qorǵaý júıeleri engizilip, nóldik jaraqattanýǵa baǵyttalǵan Vision Zero tujyrymdamasy júzege asyrylýda. Sonymen qatar jasandy ıntellekt elementteri bar beınebaqylaý júıeleri men elektrondy medısınalyq tekserýler qoldanylýda.
Búginde Shúlbi sý elektr stansııasy damýyn jalǵastyryp, jabdyqtardy jańǵyrtyp, ekologııalyq jáne sıfrlyq sheshimderdi engizýde. Bul rette eń basty qaǵıda — jumysshy mamandyqqa jáne kún saıyn stansııanyń turaqty jumysyn qamtamasyz etetin adamdarǵa degen qurmet saqtalady.
Jumysshy mamandyqtar jyly taǵy bir márte eske salady: senimdi energetıka esep pen megavatttan emes, óz isine adal adamdardan bastalady. Dál osyndaı mamandardyń eńbegi Shúlbi SES-tiń jáne el energetıkasynyń tiregi bolyp otyr.
