Jol qozǵalysy qaýipsizdigin qamtamasyz etý maqsatynda patrýldik polısııa batalonynyń jeke quramy kúsheıtilgen qyzmet rejımine aýystyryldy. Qazirgi ýaqytta oblys trassalarynda 80 ekıpaj jáne 160 polısııa qyzmetkeri jumyldyrylyp, jol jaǵdaıyn táýlik boıy baqylaýda ustap otyr. Polısııa qyzmetkerleri jol qozǵalysyna qatysýshylarǵa kómek kórsetip, kólik quraldaryn qaýipsiz alyp júrýdi qamtamasyz etip jatyr.
Bul týraly Qaraǵandy oblysy Polısııa departamentiniń baspasóz qyzmeti habarlady.
Búgin tańerteńnen bastap polısııanyń ilesip júrýimen:
- Qaraǵandy – Temirtaý baǵyty boıynsha – 500 avtokólik,
- Temirtaý – Qaraǵandy baǵyty boıynsha – 300 avtokólik,
- Aqmola oblysynyń shekarasyna deıin – 1200 avtokólik qaýipsiz ótkizildi.
«Bizdiń basty maqsatymyz - azamattardyń ómiri men densaýlyǵyn saqtaý. Osy oraıda óńir avtojoldaryndaǵy qaýipsizdikti qamtamasyz etý úshin barlyq qajetti sharalar qabyldanyp jatyr», dedi Qaraǵandy oblysy Polısııa departamenti patrýldik polısııa batalonynyń komandıri Medet Nurmuhanov.
Sonymen qatar ol oblys turǵyndary men qonaqtaryn qozǵalysqa engizilgen ýaqytsha shekteýlerge túsinistikpen qaraýǵa jáne polısııa qyzmetkerleriniń zańdy talaptaryn oryndaýǵa shaqyrdy.
Polısııa qolaısyz aýa raıy jaǵdaıynda júrgizýshilerge alys sapardan bas tartýǵa, jol belgileri men belgilengen jyldamdyq rejımin qatań saqtaýǵa, qaýipsiz araqashyqtyqty ustanýǵa, sondaı-aq marshrýtty josparlaý barysynda kúrdeli meteorologııalyq jaǵdaıdy eskerýge keńes beredi. Tótenshe jaǵdaı týyndaǵan jaǵdaıda polısııa qyzmetkerlerinen jedel kómek suraý qajet.
Aıta keteıik, Astanadaǵy aýa raıynyń qolaısyzdyǵyna baılanysty elordanyń kommýnaldyq qyzmetteri kúsheıtilgen rejımde jumys istep jatyr.
