Mınıstr jarysqa 93 elden 3 myńǵa jýyq sportshynyń qatysýy josparlanyp otyrǵanyn atap ótti. Barlyǵy 116 marapattar jıyntyǵy oınalady. Qazaqstannyń ulttyq komandasy 10 sport túri boıynsha 58 medalǵa talasady.
Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar.
«Saltanatty ashylý rásimi 2026 jyldyń 6 aqpanynda Mılan qalasynda ótedi, al jabylý saltanaty 22 aqpanda Verona qalasynda uıymdastyrylýy josparlanǵan. Oıyndar baǵdarlamasy konkımen júgirý jáne shańǵy jarysy sportshylarynyń óner kórsetýimen bastalady. Sońǵy kezeńde taý shańǵysy boıynsha jarystary ótedi», dedi Erbol Myrzabosynov.
Mınıstrdiń sózinshe, ulttyq komandanyń quramynda 35-ke jýyq sportshynyń qatysýy boljanyp otyr. 2022 jyly Pekınde ótken qysqy Olımpıada oıyndarynda elimizdiń namysyn 34 sportshy qorǵaǵan.
«Qazirgi ýaqytta Sofıa Samodelkına men Mıhaıl Shaıdorovtyń mánerlep syrǵanaýdan 2 jeke resmı Olımpıada lısenzııalary bar. Sonymen qatar, sportshylarymyz short-trekten 9, konkımen júgirýden 12 lısenzııa jeńip aldy, dedi Erbol Myrzabosynov.
Mınıstr elimizde qysqy olımpıadalyq sporttyń 13 túri damyp kele jatqanyn atap ótti. Olardyń turaqty damýyn qamtamasyz etý jáne olımpıadalyq rezervti daıyndaý maqsatynda sporttyq ınfraqurylymdy keńeıtý jumystary júrgizilýde. Búginde elimizde qysqy sport túrlerine arnalǵan 1262 sport nysany bar.
Qurylǵan ınfraqurylym qysqy sport túrleriniń qoljetimdiligin qamtamasyz etedi jáne olardyń keńinen damýyna yqpal etedi.
