Foto: dreamhost.com
Google dereginshe, eń tanymal suranys Gemini boldy. Jasandy ıntellektke arnalǵan servıs sporttyq jáne saıası oqıǵalardy da artta qaldyryp, neırojelilerge degen jahandyq qyzyǵýshylyqtyń artqanyn kórsetti. Ekinshi orynǵa Úndistan men Anglııa quramalary arasyndaǵy krıket matchtary jaıǵasty. Sondaı-aq reıtıngke qytaılyq DeepSeek neırojelisi, Iran men Izraıl arasyndaǵy qaqtyǵystyń ýshyǵýy jáne iPhone 17 jańa úlgisi endi.
2025 jyldyń eń tanymal jańalyqtary
«Jańalyqtar» sanatynda qoldanýshylar eń kóp izdegen taqyryp – AQSh-taǵy saıası belsendi, Donald Tramptyń jaqtasy Charlı Kırktiń ólimi boldy. Ol 10 qyrkúıek kúni Iýta shtatynda kópshilik aldynda sóz sóılep turǵan kezde oqqa ushqan.
Sondaı-aq eń kóp talqylanǵan jańalyqtardyń qatarynda AQSh úkimetiniń ýaqytsha jumysynyń toqtaýy, jańa Rım papasynyń saılanýy jáne Los-Andjelestegi orman órtteri bar. Internette 30 shildede bolǵan Kamchatkadaǵy joıqyn jer silkinisi de keń rezonans týdyrdy. Bul zilzala óńirde 1952 jyldan bergi eń qýatty jer silkinisi retinde tirkeldi.
Jyldyń eń tanymal tulǵalary
Saıasatkerler arasynda izdeý suranystary boıynsha Japonııanyń jańa premer-mınıstri, el tarıhyndaǵy alǵashqy áıel úkimet basshysy Sanae Takaıtı aldyńǵy qatarǵa shyqty. Ol Taıvan tóńiregindegi jaǵdaıdy Japonııa úshin qaýip dep atap, Qytaımen dıplomatııalyq shıeleniske sebep bolǵan málimdemesimen este qaldy.
«Tulǵalar» sanatynda eń kóp izdelgen esim – amerıkalyq ánshi Devıd Berk. Ol 14 jastaǵy qyzdyń ólimine baılanysty is boıynsha basty kúdikti retinde tanyldy, marqumnyń máıiti onyń kóliginen tabylǵan.
Kıno salasynda qoldanýshylar «Anora», «Sýpermen» jáne «Minecraft: kınoadaptasııa» fılmderin jıi izdegen. Al eń tanymal aktrısa – «Oskar» syılyǵynyń laýreaty Maıkı Medıson.
Google ókilderi bul reıtıng jalpy izdeý sanyna emes, ótken jylmen salystyrǵandaǵy qyzyǵýshylyqtyń ósýine negizdelgenin atap ótti.
