Sonymen qatar Aq úı basshysy HAMAS qarýyn tastaýy tıis ekenin taǵy da talap etip, kerisinshe jaǵdaıda «óte qatań saldary» bolatynyn aıtty. Tramp jýrnalısterge Palm-Bıchtegi Mar-a-Lago rezıdensııasynda pikir bildirdi. Onyń aıtýynsha, AQSh-tyń maýsym aıyndaǵy soqqysynan keıin Iran jańa nysandarda zymyran jáne ıadrolyq ázirlemelerin qaıta jandandyrýy múmkin degen aqparat bar.
«Olardyń qarýlanýdy qaıta kúsheıtip jatqany týraly oqydym. Eger solaı bolsa, biz joıǵan nysandarda emes, basqa jerlerde istep jatqan bolýy múmkin. Biz olardyń qaıda baryp, ne istep júrgenin naqty bilemiz. Olar muny istemese eken deımin, óıtkeni B-2 ushaǵymen beker otyn jaǵýdy qalamaımyz. Ondaı ushý baryp-qaıtýǵa 37 saǵat ketedi», dedi Tramp.
Osy ýaqytta Iranda ulttyq valıýta – rıaldyń kúrt qunsyzdanýy men ınflıasııanyń ósýi tirkeldi. 29 jeltoqsanda ashyq naryqta dollar baǵamy shamamen 1,39 mln rıalǵa jetken. Irandyq BAQ Tegeran, Isfahan, Shıraz jáne Meshhed qalalarynda, sonyń ishinde dúken ıeleri qatysqan narazylyqtar ótkenin jazdy. Reuters bul jaǵdaıdyń negizgi sebepteri retinde 2018 jyly AQSh qaıta engizgen sanksııalardy jáne ekonomıkany yryqtandyrýǵa qatysty sońǵy sheshimder aıasynda valıýta naryǵyna túsken qysymdy ataıdy.
Eldiń Ortalyq bankiniń tóraǵasy Mohammad Reza Farzın otstavkaǵa ketken. Onyń ótinishi prezıdent Masýd Pezeshkıannyń maquldaýyn kútip otyr.
