Ázerbaıjanda ýnıversıtet rektorynyń qyzyn eki jigit uryp ketti

ASTANA. 23 naýryz. Taıaýda ǵalamtorda Ázerbaıjandaǵy Hazar Gamlet Isahanly ýnıversıteti rektorynyń qyzy Ýlker Isaevany eki jigittiń uryp-soǵyp jatqan vıdeosy jarııalandy. Búginde bul másele atalǵan eldegi áleýmettik jelilerde qyzý talqylanýda. Bul týraly BBC habarlady. Oqıǵa Bakýdiń ortalyq kósheleriniń qıylysynda túngi mezgilde bolǵan. Kópshilik qyzdy osynshalyqty uryp-soqqany úshin jigitterdi kinálasa, keıbireýler jábirlenýshiniń ózin aıyptap otyr. Qyzdy kinálaǵandar túnde boıjetken úıde otyrýy kerek dep sanaıdy. Atalǵan vıdeo 9 naýryz kúni Bakýdegi Azadlyg jáne Ýzeır Gadjıbekov kósheleriniń qıylysynda ornalasqan beınekameraǵa jazylyp qalǵan. Jazba arqyly eki jigittiń de aty-jóni anyqtaldy. Ázerbaıjandyq BAQ-tyń aıtýynsha, olar aǵaıyndy Zaýr jáne Elın Mamedovtar. Bul jóninde: «Isaeva áleýmettik jelidegi paraqshasyna aǵaıyndy Mamedovtardyń birimen túsken sýretterin jarııalanǵan. Iаǵnı, olar burynnan jaqyn aralasady. Ýlkerdiń dostary kıkiljińniń qyzǵanyshtan týýy múmkin ekenin aıtady», dep jazady ázerbaıjandyq portaldardyń biri. Beınejazbadan eki jigittiń Isaevany «Bentlı» markaly avtokólikten shyǵaryp jatqanyn anyq kórýge bolady. Sondaı-aq, qyz taksıge otyrmaqshy bolǵanda aǵaıyndy ekeýi taǵy da kólikten shyǵaryp, soqqynyń astyna alady. Tipti aıaqpen tepkilegeni de taspaǵa jazylyp qalǵan. Osy oqıǵaǵa qatysty Baký polısııasy qylmystyq is qozǵap, jergilikti sottan Zaýr Mamedovty tutqyndaý úshin order berýin surady. Degenmen, aýdandyq sot bul ótinishti qanaǵattandyrmaı, Mamedov bostandyqta qaldy. Sot óz sheshimin Isaeva hanymnyń tarapynan eshqandaı aryzdyń bolmaýymen túsindirdi. Olardyń málimdemesinde: «Ýlken Isaeva aǵaıyndy Mamedovtarǵa qarsy shaǵymdanǵan joq jáne ózin uryp-soǵý faktisin moıyndamady», delingen. Alaıda, sottyń bul sheshimimen kelispegen Bas prokýratýra apellıasııaǵa berip, isti qaıta qaraýdy surady. Prokýratýranyń bul áreketinen keıin aǵaıyndylardyń bireýi qamaýǵa alyndy. Elaman Qońyr. Derek, sýret: bbc.co.uk.