Bir kún, bir apta, bir aı emes, bir jylmen qosh aıtysyp, jańa aspanǵa jaýtań-jaýtań qaraıdy. «Aspan bolǵan soń, ashyǵy jaqsy» deıtin Oralhan Bókeı. Allaǵa shúkir, alash balasynyń aspany ashyq, el aman, jurt esende jyldyń jańa kúntizbesimen esen kóristi. «Eski jyl esirkesin, jańa jyl jarylqasyn» deıtin halqymyz bul jyly da ár qıynǵa qarmanary sózsiz. Beıbit eldiń berekesi úshin jyl túgili aı týǵanda bata qylatyn el burynǵy ádetinen jazbasa, almaıtyn asý joq.
Basqa basqa, qazaq balasynyń ótken jylǵa ókpesi joq shyǵar. Qaıta eldiń ishki, syrtqy jaǵdaıy burynǵysynan góri rettelip, jahandyq damý tetikterin der kezinde qolǵa alyp jatqan sııaqtymyz. Jasandy ıntellekt jáne sıfrlyq damý mınıstrligi quryldy. Bul salada jastar jańalyqty údetip keledi. Sheteldegi qazaq ǵalymdary «Otandas ǵalymdar» forýmynda tuńǵysh ret Astanada bas qosty. Olar qashanda memleketimizdiń damýyna múddeli ekenin bildirip, qoldan kelgenin aıanbaıtynyn málimdedi.
Jalǵyz Otanymyz Qazaqstan deıdi jáne qyzmet etýge daıyn. Prezıdent Qasym-Jomart Toqaev álemniń alpaýyt elderiniń kóshbasshylarymen kelissózder júrgizip, halyqaralyq arenada bedelge ıe boldy. Atap aıtqanda, Qytaı, Japonııa, Reseı, AQSh jáne Eýropalyq odaqpen «Ortalyq Azııa +» formatynda sammıtter ótkizdi. Tashkentte Ortalyq Azııa memleketteri basshylarynyń VII konsýltatıvtik kezdesýine qatysty. «Barlyq alpaýyt memleketter Qazaqstannyń mańyzyn sezindi jáne moıyndady. Eýropa elderi men Japonııa saıası jáne ekonomıkalyq baılanystardy nyǵaıtýǵa nıet bildirdi, – dep jazdy reseılik jýrnalıst Leonıd Mlechın.
Eldiń etegi qymtalyp, syrty bútindele túskeni óz aldyna, órisi keńigeni osyndaıda bilinedi. Sáıkesinshe, ishki ahýal da turaqty. Eldigimizdiń bir sıpaty hakim Abaıdyń 180 jyldyq mereıtoıynda bilingendeı. Ulylar mekeni Semeıge ár oblys hal-qaderinshe bir-bir nysannan salyp berýdi kemeńgerdiń toıynda yrym etip, qadasyn qaǵyp bastap ketken aımaqtar da bar. Halyqaralyq TÚRKSOI uıymy qalap, memleket uıǵarýymen Aqtaý bir jyl boıy túrki áleminiń mádenı astanasy rólin atqardy. Onda túbi bir túrki elderiniń mádenıeti men ortaq muralary qaıta jańǵyryp, kóshpeliler órkenıetiniń týy jelbiredi de turdy. Jyl basynan sońyna deıin 30-dan astam halyqaralyq is-shara júzege asypty. Munda memleketimizdiń túrki elderi birligin nyǵaıtýǵa baǵyttalǵan turaqty mádenı saıasaty aıryqsha ról atqardy. Prezıdenttiń mádenıet, ǵylym men bilim, jastar almasýy salalaryndaǵy naqty bastamalarǵa negizdelgen túrki ıntegrasııasy jónindegi ustanymy búkil túrki áleminde keń qoldaý taýyp, joǵary baǵalandy. Aqtaýda júzege asqan TÚRKSOI jobalary sol bastamalardyń naqty nátıjege aınalyp, baýyrlas halyqtardy burynǵydan da jaqyndastyra túskenin kórsetti. Bul týraly Túrki memleketteri uıymy Aqsaqaldar keńesiniń tóraǵasy, Túrkııanyń kórnekti qaıratkeri Bınalı Iyldyrym sóıledi:
«Qazaqstan – Túrki áleminiń turaqtylyǵyn qamtamasyz etip turǵan tirek elderdiń biri ǵana emes, onyń qýatty ortalyǵy. Túrki memleketteri uıymyndaǵy konstrýktıvti róli, ekonomıkalyq ornyqtylyǵy, baı mádenı murasy jáne turaqty damýy Qazaqstandy Túrki elderiniń arasynda kóshbasshy deńgeıge kóterip otyr», dedi ol Mańǵystaýda ótken «Aqtaý – Túrki áleminiń mádenı astanasy» jylynyń jabylý saltanatynda. El kóleminde budan da basqa eleýli oqıǵalar ótip, nıetimiz ben peıilimiz bir arnaǵa toǵysqanyn termelep túbine jetpesimiz anyq. Aınalyp kelgende, jalǵyz-aq tirek mynaý: «Betege ketse, bel qalar, bekter ketse, el qalar, berekeń ketse neń qalar?» degen babalar ósıeti. Demek, basty olja – berekemizdiń qashpaǵany. Júgimiz aýmaı, júnimiz jyǵylmaı 2026-ǵa aıaq bastyq. Ashyq aspan astynda jurtymyz taıly-tuıaǵymen azattyqtyń 35-jylyn bastap jiberdi. Ári qaraı órisimizdi keńeıtemiz desek, talaptyǵa Táńiriniń árbir kúni – qut-qazyna.
P.S. Qanshama izgi úmit pen nurly tilek, jarqyn oı men jaqsy nıet kelgen jyldan qaıyr kútip, bereke tileıdi. Ár úmit pen aq tileýdi bir-bir ushqynǵa balasaq, jańa jylda týǵan juldyzdarmen qosa jarqyrap, jerdiń betin qanshalyqty jaryqtandyra túserin, átteń biz kórmeıtin shyǵarmyz. Biraq túısinýge bolatyn qubylys. Qysty kúngi tymyqta tolǵan aıdyń astyn kezseńiz, árbir kóbelek qar óz aldyna jarqyrap ushqyn ataryn kórgen shyǵarsyz. Qar ekesh qardyń ózi sóıtkende, sizdiń izgilik jerde qalar ma? Talaptyǵa qanat bitiretin Táńiri bar ǵoı. Izgilikpen etken árekettiń túbi ıgilikke aınalmaı qoımaıdy. Jańa kún men aıdan, jyldan jaqsylyq kútip jasampazdyq jolyn betke alatyny sodan bolsa kerek ultymyzdyń.
Kelgen jyl kelisti hám jemisti bolǵaı!
