Onyń aıtýynsha, elimizdiń iri áýe toraptarynda birqatar ınfraqurylymdyq jobalardy iske asyrý josparlanǵan. Atap aıtqanda, Astana jáne Shymkent áýejaılarynda ekinshi ushý-qoný jolaqtarynyń qurylysy bastalady. Sonymen qatar Almaty áýejaıynyń ishki reıster termınaly qaıta jańǵyrtylyp, Aqtaý áýejaıynyń perronyna kúrdeli jóndeý júrgiziledi.
Sonymen qatar óńirlik jobalar da qatar iske asyrylmaq. Olardyń qatarynda Atyraý áýejaıynda jańa termınal salý, Pavlodar aerodromyn rekonstrýksııalaý, kýrorttyq aımaqtardaǵy Katonqaraǵaı, Zaısan jáne Kendirli áýejaılarynyń qurylysyn aıaqtaý, sondaı-aq Arqalyq áýejaıyn qalpyna keltirý bar.
Saltanat Tompıeva 2026 jyldyń sońyna deıin qazaqstandyq áýe kompanııalary 9 jańa ushaq satyp alýdy josparlap otyrǵanyn aıtty. Bul áýe kemeleri parkiniń jalpy sanyn shamamen 118 birlikke deıin jetkizip, áýe tasymalynyń ótkizý qabiletin arttyrýǵa múmkindik beredi. Aımaqtardyń kólik qoljetimdiligin qamtamasyz etý jáne týrızmdi damytý maqsatynda 23 áleýmettik mańyzy bar áýe baǵyty boıynsha sýbsıdııalaý baǵdarlamasy da jalǵasyn tabady.
Budan bólek, 2026 jyly halyqaralyq áýe qatynasyn damytý jumystary da kúsheıtiledi. Jańa halyqaralyq baǵyttardy ashý jáne buryn toqtatylǵan reısterdi qaıta jandandyrý, sondaı-aq qoldanystaǵy baǵyttar boıynsha reıster jıiligin arttyrý kózdelip otyr. Marshrýttyq jelini Ortalyq Azııa men TMD elderine, sondaı-aq Taıaý Shyǵys, Eýropa jáne Azııa memleketterine keńeıtý josparlanǵan. Atap aıtqanda, Vena, Tokıo, Rım, Abý-Dabı, Er-Rııad, Dammam, Larnaka, Amman, Sıan, Shanhaı, Ýrýmchı, Kashgar, Varshava jáne ózge de baǵyttar bar.
Josparlanǵan jobalar Qazaqstannyń halyqaralyq avıasııalyq baılanystaryn keńeıtip, eldiń óńirlik jáne tranzıttik hab retindegi rólin kúsheıtýge baǵyttalǵan.
