AQSh sanksııa tizimin Nemsovtyń keńesimen jasap turǵan

ASTANA. 23 naýryz. Nemistiń Frankfurter Allgemeine Sonntagszeitung gazeti 22 naýryz kúni arnaıy qyzmet organdaryndaǵy óz mánbesine súıene otyryp, Reseı saıasatkeri Borıs Nemsovtyń óltirilýine qatysty taǵy bir versııany alǵa tartty. Buǵan oppozısıonerdiń Amerıka bıligimen qoıan-qoltyq jumys júrgizip kelgeni sebep bolýy múmkin. Bul týraly nemistiń Deutsche Welle basylymy habarlady. Gazettiń málimetine qaraǵanda, Kremldiń 2014 jyldyń naýryzynda Qyrymdy anneksııalap alýyna baılanysty Reseıdiń belgili saıasatkerleri men kásipkerlerine qarsy sanksııa tizimin daıyndaýy barysynda Vashıngton udaıy Nemsovtyń jetkizip turǵan aqparyn paıdalanyp otyrǵan. Reseıdegi oppozısıoner Vladımır Mılov kisi óltirýdiń mundaı boljamy birshama shyndyqqa sáıkes keledi dep esepteıdi. Onyń sózine qaraǵanda, Pýtın men onyń aınalasy basynda atalmysh sanksııalar Reseıdiń qarjy sektoryna munshalyqty qatty áser etedi dep oılamaǵan. Basylym: «Olar sanksııanyń osyndaı qatqyl formatta qoldanylyp jatqanyna baıaǵydan Nemsovtyń jeke ózin kinálap qoıǵan», - dep, Mılovtyń sózinen dáıekteme keltiredi. Budan bólek, Nemsov AQSh-ta 2012 jyly qabyldanǵan «Magnıtsıı tizimi» dep atalatynnyń qalyptasý barysynda da Vashıngtonǵa quraq ushyp, járdem bergen. Nemistiń joǵarydaǵy FAS gazetiniń aqparynsha, saıasatker 2014 jyly Amerıkanyń respýblıkashyl senatorlary Djon Makkeınmen jáne Ron Djonsonmen arnaıy kezdesken. Kezdesý kezinde Nemsov keńeıtilgen tizimge qosý úshin olarǵa taǵy 12 reseılik azamattyń aty-jónin usynady. Olardyń arasynda Pýtınmen tyǵyz baılanysta júrgen kisiler de bolǵan. «Nemsovtyń tirlikterin amerıkalyq mıllıarder Djordj Soros qarjylandyryp turǵan», - dep jazady gazeti budan ári. Bylaısha aıtqanda, ataqty «Soros» qorynyń egesi Borıs Nemsovty AQSh bıiligi atynan jaldap alǵan. Nemese Vashıngtonǵa jaldanǵan saıasatkerdiń bar shyǵynyn osy Dj. Soros Aqúıdiń ótinishi boıynsha kóterip kelgen. Murat Aıtqoja.