Foto: istockphoto.com
Saltanat Tompıevanyń aıtýynsha, aldaǵy jyly elimizdiń iri avıasııalyq toraptarynda keshendi jobalar qolǵa alynady.
«Osy rette elimizdiń iri avıasııalyq toraptarynda ınfraqurylymdyq jobalar keshenin iske asyrý josparlanyp otyr. Atap aıtqanda, Astana jáne Shymkent áýejaılarynda ekinshi ushý-qoný jolaqtarynyń qurylysy bastalady, Almaty áýejaıynyń ishki reıster termınaly qaıta jańǵyrtylady, sondaı-aq Aqtaý áýejaıynyń perronyna kúrdeli jóndeý júrgiziledi», dedi ol.
Sonymen qatar, óńirlik avıasııany damytý baǵytynda Atyraýda jańa termınal salý, Pavlodar áýejaıyn rekonstrýksııalaý jáne Qatonqaraǵaı, Zaısan, Kendirli kýrorttyq aımaqtaryndaǵy áýejaılar qurylysyn aıaqtaý josparlanǵan. Sondaı-aq, Arqalyq áýejaıy da qaıta qalpyna keltirilmek.
Áýe parki men jańa baǵyttar
2026 jyldyń sońyna deıin otandyq áýe kompanııalary taǵy 9 jańa áýe kemesin satyp alýdy kózdep otyr.
«Bul áýe parkin shamamen 118 birlikke deıin ulǵaıtyp, áýe tasymaldarynyń ótkizý qabiletin arttyrýǵa múmkindik beredi. О́ńirlerdiń kólik qoljetimdiligin qamtamasyz etý jáne týrızmdi damytý maqsatynda áleýmettik mańyzy bar 23 áýe baǵyty boıynsha sýbsıdııalaý baǵdarlamasy jalǵasyn tabady», dep túsindirdi Saltanat Tompıeva.
Halyqaralyq qatynastar geografııasy da aıtarlyqtaı keńeıedi. Ortalyq Azııa men TMD elderinen bólek, Vena, Tokıo, Rım, Abý-Dabı, Ár-Rııad, Dammam, Larnaka, Amman, Sıan, Shanhaı, Úrimshi, Qashǵar jáne Varshava sııaqty álemniń iri qalalaryna jańa reıster ashylady dep kútiledi.
Salanyń uzaq merzimdi damýy úshin ICAO-men birlese otyryp, azamattyq avıasııanyń Bas jospary ázirlenip, 2050 jylǵa deıingi damý strategııasy daıyndalmaq. Komıtet tóraǵasynyń paıymdaýynsha, bul sharalardyń barlyǵy jıylyp kelgende ushý qaýipsizdigin kúsheıtip, Qazaqstannyń halyqaralyq avıasııalyq júıedegi rólin nyǵaıtýǵa jol ashady.
