Foto: Anadoly
Florıdada ótken baspasóz máslıhatynda Keın «Sońǵy sheshim» dep atalǵan operasııany josparlaý men daıyndaý birneshe aıǵa sozylǵanyn jáne oǵan Ortalyq barlaý basqarmasy (SRÝ) men Ulttyq qaýipsizdik agenttigi (UQA) qoldaý kórsetkenin málimdedi.
Onyń aıtýynsha, AQSh jeltoqsan aıynyń basynan beri beıbit turǵyndar arasyndaǵy shyǵyndy azaıtyp, tosynnan soqqy jasaý faktoryn barynsha paıdalaný úshin qolaıly kúndi kútken. Aýa raıy jaqsarǵan soń, prezıdent Donald Tramp jergilikti ýaqytpen saǵat 22:46-da operasııany bastaý týraly buıryq bergen.
Keın tún ishinde Batys jarty shardaǵy qurlyqtaǵy jáne teńizdegi 20 túrli bazadan ushaqtar kóterilgenin aıtty. Jalpy alǵanda, operasııaǵa 150 bombalaýshy, joıǵysh jáne barlaý ushaǵy qatysqan.
Onyń sózinshe, ushý quramyndaǵy eń jas áskerı qyzmetker 20 jasta, al eń úlkeni 49 jasta bolǵan. Tikushaqtar sý deńgeıinen shamamen 30 metr bıiktikte ushqan.
Operasııa barysynda F-22, F-35 jáne B-1 úlgisindegi ushaqtar, sondaı-aq kóp mólsherde drondar paıdalanylǵan. Venesýela aýmaǵyna jaqyndaǵan kezde eldiń áýe qorǵanys júıeleri isten shyǵa bastaǵan. Ushý kezinde operasııaǵa AQSh-tyń Ǵarysh qolbasshylyǵy men Kıberqolbasshylyǵy da qoldaý kórsetken.
Jergilikti ýaqytpen saǵat 02:01-de Karakasta Madýro kesheni tosynnan basyp alynǵan. Keınniń aıtýynsha, maqsatqa jetken kezde tikushaqtarǵa oq atylǵan, al olar ózin-ózi qorǵaý maqsatynda jaýap qaıtarǵan. AQSh-tyń bir ushaǵy zaqymdanǵanymen, ushýyn jalǵastyra alǵan.
General operasııa barysynda barlaý bólimsheleri qurlyqtaǵy áskerge naqty ýaqyt rejıminde aqparat berip otyrǵanyn atap ótti. Nıkolas Madýro men onyń jubaıy Sılııa Flores berilip, AQSh Ádilet mınıstrligi tarapynan qamaýǵa alynǵan.
Keın AQSh tarapy bul operasııa kezinde adam shyǵynyna ushyramaǵanyn rastady. Madýro men onyń jubaıy ustalǵannan keıin amerıkalyq ásker Venesýela aýmaǵynan shyǵaryla bastaǵan.
Evakýasııa kezinde joıǵysh ushaqtar men drondar áýeden jáne atystyq qoldaý kórsetken. Onyń aıtýynsha, barlyq ushaq bazalaryna aman-esen oralǵan.
Joǵarǵy sottyń sheshimine sáıkes, Delsı Rodrıges Nıkolas Madýro tutqyndalǵannan keıin prezıdenttiń mindetin ýaqytsha atqarady.
Venesýela Karakastaǵy jarylystardan keıin AQSh-ty áskerı agressııa jasady dep aıyptady
The Economic Times málimetine sáıkes, Konstıtýsııalyq palata bul sheshimdi basqarý toqtap qalmaýy jáne ákimshiliktiń turaqty jumys isteýin qamtamasyz etý úshin qabyldady.
Sottyń qaýlysynda Rodrıges «Venesýela Bolıvarıan Respýblıkasynyń prezıdentiniń mindetin atqaryp, eldiń ákimshilik jumystarynyń jalǵasýyn jáne qaýipsizdigin qamtamasyz etedi» dep kórsetilgen.
Sheshim Madýro qyzmetinen alynyp, AQSh-qa jetkizilgennen keıin birneshe saǵat ótken soń qabyldandy. Bul oqıǵa munaıǵa baı Ońtústik Amerıka elin basqarý máselesinde belgisizdik týǵyzdy.
Venesýela vıse-prezıdenti Delsı Rodrıges AQSh-tan Nıkolas Madýrony dereý bosatýdy talap etip, «Venesýela eshbir eldiń otary bolmaıtynyn» jarııa etti.
