Foto: Virginia Mayo
Málimdemede odaqtyń ustanymy aıqyn kórsetilgen. Ol Nıkolas Madýrony demokratııalyq jolmen saılanǵan zańdy prezıdent dep moıyndamaıdy. Sonymen qatar Brıýssel Venesýelada demokratııaǵa kóshý prosesi beıbit sıpatta ótýi jáne ony venesýelalyqtardyń ózi júzege asyrýy qajet dep esepteıdi. Bul rette eldiń egemendigi men táýelsizdigi tolyq saqtalýy tıis ekeni atap ótilgen.
Kaıa Kallastyń aıtýynsha, qazirgi daǵdarystan shyǵýdyń jalǵyz joly – Venesýela halqynyń erik-jigerin qurmetteý. Ol halyqaralyq quqyq qaǵıdattary kez kelgen jaǵdaıda saqtalýy qajet ekenin aıtyp, bul máselede AQSh-tyń erekshe jaýapkershiligi baryn eske saldy. Sebebi Vashıngton BUU Qaýipsizdik Keńesiniń turaqty múshesi sanalady.
EO qujatynda transulttyq uıymdasqan qylmysqa jáne esirtki trafıgine qarsy kúrestiń mańyzdylyǵy da sóz bolady. Alaıda mundaı áreketter tek Venesýelanyń aýmaqtyq tutastyǵy men egemendigi tolyq saqtalǵan jaǵdaıda ǵana júrgizilýi tıis dep kórsetilgen.
Eske sala keteıik, buǵan deıin AQSh-tyń burynǵy prezıdenti Donald Tramp Venesýelanyń ýaqytsha prezıdenti dep atalǵan Delsı Rodrıgeske qatysty málimdeme jasap, Vashıngton talaptary oryndalmasa, saldary bolatynyn aıtqan edi. Onyń sózinshe, AQSh Venesýela bıliginiń yntymaqtastyqtan bas tartýyna shydamaıdy.
BUU qaýipsizdik keńesi Venesýeladaǵy jaǵdaıǵa baılanysty shuǵyl otyrys ótkizedi
