Prezıdent • 05 Qańtar, 2026

Toqaev: Gazet-jýrnaldar qaıta órleý dáýiriniń bastaýynda tur

50 ret

kórsetildi

3 mın

oqý úshin

«Turkistan» gazetinde Prezıdent Qasym-Jomart Toqaevtyń basylymnyń bas redaktory Baýyrjan Babajanulyna bergen keń kólemdi suhbaty jaryq kórdi, dep habarlaıdy Egemen.kz.

Qyrmyzy JUMAǴALIQYZY

Toqaev: Gazet-jýrnaldar qaıta órleý dáýiriniń bastaýynda tur

Memleket basshysy suhbat barysynda «Turkistan» basylymynyń 30 jyldyq tarıhyna toqtalyp, ony elimizdegi eń yqpaldy basylymdardyń biri retinde atap ótti.

«Turkistan» gazeti 30 jyldan beri turaqty shyǵyp keledi. Bul – Qazaqstandaǵy eń yqpaldy basylymnyń biri. Gazettiń ataýynda da óte úlken mán-maǵyna bar. Basylym tilshileri el ishindegi ózekti máselelermen qatar, tutas túrki jurtyna ortaq taqyryptardy da kóterip júredi. Bul óte jaqsy dástúr dep sanaımyn», dedi Qasym-Jomart Toqaev.

Qasym-Jomart Toqaev qazirgi tańda gazet-jýrnaldardyń qaıta órleý dáýiri bastalyp jatqanyn alǵa tartty. Prezıdent áleýmettik jelilerdiń adamnyń tanymdyq qabiletine tıgizer keri áserin ashyq aıtty:

«Shetelde jumys istep, túrli salada tabysqa jetken qazaqtar týraly maqalalardy qyzyǵýshylyqpen oqımyn. Qazaqstan men ózderi turyp jatqan elder arasyndaǵy yntymaqtastyqty damytýǵa úles qosyp júrgen osyndaı úsh azamatty arnaıy marapattadym.
Gazet-jýrnaldar qaıta órleý dáýiriniń bastaýynda tur. Sebebi, áleýmettik jeli adamnyń oılaý (tanymdyq) qabiletine zor zııan keltirip jatyr. Jasy qyryqqa jetse de, bilimi men oı-órisi on bes jastaǵy jasóspirimder deńgeıinde qalyp qoıǵan azamattardy qazirdiń ózinde kezdestirýge bolady», dedi Memleket basshysy.

Prezıdent óziniń de merzimdi baspasózdi úzbeı oqıtynyn, sapaly saraptama men tereń aqparatty dástúrli basylymdardan alatynyn jetkizdi. Onyń pikirinshe, TikTok nemese Instagram sııaqty jeliler eńbek adamdarynyń shynaıy tynys-tirshiligin tolyq kórsete almaıdy.

«О́z basym merzimdi baspasózdi jas kezimnen úzbeı oqıtynym ras. Áli kúnge deıin osy ádetimnen jańylǵan emespin. Qazirgi tańda baspasóz zaman talabyna beıimdelip, aqparat aıdynynan óz ornyn taýyp otyr. Gazet tilshileri jan-jaqty sholýlar men tereń saraptamalar jasaýǵa basa mán beredi, aǵartýshylyqpen aınalysady. Kásibı ári óz isine adal jýrnalıster sapaly materıaldar ázirlep, dástúrli qundylyqtardy saqtaýǵa eleýli úles qosyp keledi. Men súıikti Otanymyzdyń ıgiligi úshin barlyq salada tabysty eńbek etip júrgen myqty azamattar týraly málimetterdi kóbinese gazetterden alamyn. El ishine keń taralǵan TikTok, Instagram nemese Telegram arnalary eńbek adamdarynyń shynaıy tynys-tirshiliginen alys ekenin ózińiz de jaqsy biletin shyǵarsyz», dedi Qasym-Jomart Toqaev.

Prezıdent jastardyń naǵyz bilim-ǵylym jolyna túsýge talpynyp jatqanyna senim bildirdi.

«Qoǵamymyz eleń eterlik jańalyq oqyp, beınejazba kórýmen shektelmeı, mán-maǵynasy tereń aqparattyń da qadirin bilgeni durys dep sanaımyn. Kóptegen jastarymyzdyń da dál solaı oılaıtynyna qýanamyn. Sebebi, olar adamdy tyǵyryqqa tireıtin eles-qııal áleminde ómir súrýdi emes, naǵyz bilim-ǵylym jolyna túsýdi maqsat tutady. Oqý mádenıeti joǵary elder árdaıym jahandyq damýdyń alǵy shebinde bola beretini sózsiz. Buǵan esh kúmánim joq», dedi Prezıdent.