Foto: Aqorda
Prezıdent Qasym-Jomart Toqaevtyń aıtýynsha, Qazaqstan byltyr energetıka jáne turǵyn úı-kommýnaldyq sharýashylyq salasynda Táýelsizdik jyldaryndaǵy eń iri reformany bastady. Onyń negizgi maqsaty – ondaǵan jyl boıy tozyp, apattyq jaǵdaıǵa jetken ınfraqurylymdy jańǵyrtý jáne salany turaqty damý jolyna shyǵarý.
Memleket basshysy búginde júzdegen shaqyrym ınjenerlik jáne elektr jelilerin salý qajettigin atap ótti. Qazir bul aýqymdy jobalardyń esep-qısaby ázirlenip jatyr.
«Shynymen de, Úkimet energetıkalyq jáne kommýnaldyq nysandardy jappaı jańǵyrtý jumystaryn qolǵa aldy. Uzyndyǵy júzdegen shaqyrym bolatyn ınjenerlik jeliler men elektr qýatyn taratatyn jeliler salýymyz kerek. Búgingi tańda osy aýqymdy jobanyń esep-qısaby ázirlenip jatyr. Qazirdiń ózinde qaýipti «qyzyl» aımaqta turǵan jylý elektr stansııalarynyń sany 19-dan 10-ǵa deıin azaıdy. Qabyldanǵan sharalardyń nátıjesi kórine bastady. Nysandardyń apattyq jaǵdaıǵa tap bolý qaýpi seıilip keledi», dedi Memleket basshysy.
Sonymen birge Prezıdent tek ınfraqurylymdy qalpyna keltirý jetkiliksiz ekenin, eń bastysy – jumys tásilin túbegeıli ózgertý kerektigin basa aıtty. Onyń sózinshe, jańǵyrtý sharalary salaǵa ınvestısııa tartýǵa qolaıly jaǵdaı jasap, shynaıy naryqtyq tetikterdi qalyptastyrýǵa tıis.
«Úkimettiń shuǵyl sharalary máseleniń túpki máninen týyndap otyr. Sebebi, energetıka jáne turǵyn-úı kommýnaldyq sharýashylyǵy kez kelgen memlekettiń ómir súrýine asa qajetti tuǵyr sanalady. Bul negiz shaıqalsa, basqasy túgel kúıreıdi. Tamyry tereńge ketken ekonomıkalyq máselelerge ondaǵan jyldar boıy nazar aýdarylǵan joq. Qalalar men aýyldardaǵy ınfraqurylym tozdy, energetıka nysandary men kommýnaldyq jeliler ábden eskirdi. Qordalanǵan túıtkilder kúrmeýi qıyn kúrdeli máselege ulasty. Bul sala jyrtyq-tesigin jantalasa jamap-jasqap, bıýdjet qarjysyn úzdiksiz quıýǵa týra keletin «kommýnaldyq ajdahaǵa» aınaldy. Buǵan jurttyń eti úırenip, azamattar sharasyz kúıge tústi», dedi Qasym-Jomart Toqaev.
Prezıdenttiń pikirinshe, tarıfterdiń jasandy túrde tómen ustalyp kelýi aýqatty toptarǵa jasyryn sýbsıdııa berýmen teń.
«Soǵan qaramastan, bizdiń úkimetterimiz «avgııdiń atqorasyn» tazalaýǵa asyqqan joq. Sebebi, mundaı kúrdeli jumys eshkimge jaqsy ataq ákelmes edi. Eń damyǵan otyz memlekettiń qataryna qosylý sııaqty «keremet» baǵdarlamalar ázirlep, onyń «tabysty» oryndalǵany týraly baıandaý áldeqaıda jeńil bolatyn. Shyndyqty jasyryp, bir sáttik aldamshy jetistikterge umtylý aqyrynda memleketimiz úshin tym qymbatqa tústi.
Shynymdy aıtaıyn, jeke abyroıymdy oılasam, men de bul jumysty kelesi basshylyqqa ysyra salar edim. Biraq, halyqtyń kózi úırengen taptaýryn túsinikterge qaıshy kelse de, men úshin qaǵaz júzinde emes, is júzinde naqty nátıjege qol jetkizý bárinen de mańyzdy», dedi Memleket basshysy.
Sondyqtan áleýmettik ádildikti qalpyna keltirý úshin tarıf saıasatyn ózgertý qajet. Memleket tek shyn máninde kómekke muqtaj azamattarǵa ataýly qoldaý kórsetýi tıis.
«Áleýmettik ádildikti qalpyna keltirý úshin, eń aldymen, máseleni sheshý joldaryn ózgertý qajet. Memleket kómekke shyn muqtaj adamdarǵa ǵana tikeleı, ataýly ótemaqy tóleý arqyly qoldaý kórsetýge mindetti. Sondyqtan, tarıfterdi kóterý – aqylǵa qonymdy, ıaǵnı tıimdi jáne ádil ekonomıka qurý úshin asa qajet qadam. Kim qansha tutynsa, sonsha tóleıdi, qoldaýǵa shynymen zárý adamdarǵa ǵana kómek beriledi. Tarıfter ádiletti bolýy kerek, ıaǵnı «neǵurlym kóp tutynǵan, soǵurlym kóp tóleıdi» degen qaǵıdat berik ornyǵýǵa tıis. Men osyndaı naqty mindet qoıyp otyrmyn. Alǵashqy oń nátıjeler bar. Tólem júıesine saralanǵan tásil engizildi. Sýdy jáne elektr qýatyn barynsha únemdep paıdalanatyn turǵyndar «tutynýdyń áleýmettik normasyna» sáıkes tólemdi eń tómen tarıfpen tóleıtin boldy», dedi Prezıdent.
Qasym-Jomart Toqaev áleýmettik ıgilikterdi ádil bóletin jańa júıe ǵana zamanǵa saı ınfraqurylym men tıimdi energetıka salasyn qalyptastyrýǵa múmkindik beretinin aıtty. Onyń sózinshe, bul reformalar el ekonomıkasynyń sapalyq turǵydan ósýine qýatty serpin beredi.
