Suhbat barysynda Qasym-Jomart Toqaev burynǵy Prezıdent Nursultan Nazarbaevtyń jańa jyl qarsańynda Kremlde Reseı basshysymen taǵy da kezdesýine qatysty pikir bildirdi.
Baýyrjan Babajanuly saýalynda kezdesý týraly kóptegen pikir aıtylyp, ósek-aıań órbigenine nazar aýdardy. Sondaı-aq Qasym-Jomart Toqaev byltyrǵy suhbatynda Tuńǵysh prezıdent partııanyń iri qaıratkeri retinde kóp ýaqytyn ótkizgen Máskeýdi saǵynatyn bolar, sondyqtan ol jaqqa jıi barady dep túsindirgenin eske saldy. Dese de «Turkistan» gazetiniń bas redaktory kóptegen azamat Memleket basshysy Toqaevtyń osyndaı «sammıtterge» shynaıy kózqarasyn bilgisi keletinin aıtty.
«Turaqty túrde ótkizilip júrgen kezdesýler beıresmı sıpatqa ıe. Muny Reseı prezıdentiniń ózi de atap ótedi. Taıaýda ótken Sankt-Peterbýrgtegi basqosýda Vladımır Pýtın maǵan Nursultan Nazarbaevty onyń ótinip suraýy boıynsha qabyldaıtynyn aıtqan edi.
Reseı prezıdentiniń ereksheligi: ol dostarymen jáne áriptesterimen jyly qarym-qatynas qura biledi. Jumysy óte qarbalas bolsa da, senbi kúni Qazaqstannyń Tuńǵysh prezıdentimen asyqpaı áńgimelesýge ýaqytyn bóldi. Ol Nursultan Nazarbaevty Eýrazııadaǵy yqpaldastyq úderisiniń bastaýynda turǵan tájirıbeli saıasatker retinde baǵalaıdy. Reseı bul úderiste jetekshi ról atqaryp otyr. Kremldegi kezdesý Vladımır Pýtınniń adamgershiligi joǵary ekenin kórsetedi.
Ondaı áńgimeler barysynda ne aıtylǵany maǵan qyzyq emes, bul týraly eshqashan suraq qoımaımyn.
Al, Nursultan Nazarbaevtyń jeke basyna keler bolsaq, men ony qazirgi qazaq memlekettiginiń negizin qalaǵan tulǵa dep sanaıtynymdy birneshe ret aıttym. Onyń memlekettik ınstıtýttardy jáne ekonomıkanyń naryqtyq tetikterin qurý, jańa astanamyzdy salý jolyndaǵy eńbegin bári biledi. О́zińizge málim, biz Qazaqstandy Ádildik, Zań jáne Tártip ornaǵan el etkimiz keledi. Sondyqtan, eshkimdi alalamaı, ár azamattyń eńbegin ádil baǵalaý kerek. Bul elimizdiń Tuńǵysh prezıdenti Nursultan Nazarbaevqa da qatysty», dedi Prezıdent.
