Qyzyl kitapqa enetin suńqyldaq aqqýdy aýyl turǵyndarynyń biri baıqap qalǵan.
– Pavlodar aýdany Maraldy aýylynda turamyz. 3 qańtar kúni keshkilik ata-anamyzǵa bara jatyp, dál aýyl shetinde qarda otyrǵan aqqýdy kórdik. Qustyń ábden tońyp, ashyǵyp qalǵany baıqaldy, ushyp ketýge shamasy joq.
Jaqyndap kelgende bizden qorqyp, qanatyn sabalap qashyp ketti. Aýyldaǵy adamdarǵa aıtyp edik, turǵyndardyń jartysy bizge kelip kómektesti, bárimiz júgirip áreń degende ustap aldyq, – deıdi aýyl turǵyny Mıhaıl Krıvobokov.
Pavlodar orman jáne janýarlar dúnıesin qorǵaý mekemesiniń basshysy Ajdar Júsipov qutqarylǵan qus aqqýdyń suńqyldaq túrine jatatynyn habarlady. Suńqyldaq aqqý Qazaqstanda jáne Reseıde Qyzyl kitapqa engen.
– Jalǵyz aqqýdy bizdiń ormanshylarymyz aýylǵa baryp qabyldap aldy. Ony Pavlodarskoe aýylyndaǵy belsendi demalys ortalyǵyna ákelip ornalastyrdyq. Munda haıýanattardy ýaqytsha ustaý orny bar. Buǵan deıin bıyl jyly jaqqa usha almaı qalǵan 4 aqqý osy ortalyqqa ornalastyrylǵan. Endi olardyń qataryna besinshisi qosylyp otyr. Aqqýlardyń barlyǵy kóktemge deıin kútilip, ushyrylady, – deıdi ol.
