«Astana eko polıgony» kásipornynyń qyzmetkerlerimen áńgime barysynda ekologııalyq qaýipsizdik máseleleri, sondaı-aq elordada qaldyqtardy basqarý júıesin damytý perspektıvalary talqylandy.
Ajar Saǵandyqova mundaı polıgondar topyraqqa ǵana emes, atmosferaǵa da eleýli ekologııalyq qaýip tóndiretinin atap ótti. Turmystyq qaldyqtyń ydyraý prosesinde óte qaýipti ári ýly gaz – metan bólinedi. Onyń ıisi men dámi bilinbegenimen adam aǵzasyna asa zııan.
Tekserý barysynda 2025 jyly polıgonnyń ekinshi bóligi jobalyq qýatyna jetkeni, al úshinshi bóligi áli paıdalanýǵa berilmegeni anyqtaldy. Oǵan qosa, qaldyqtar burynǵysynsha qolmen suryptalady. Al polıgondy keńeıtý týraly jobalyq qujattama qazirgi zamanǵy ekologııalyq talaptardy eskere otyryp pysyqtaýdy qajet etedi.
Suryptaý kórsetkishteriniń qaıta óńdeý talaptaryna saı kelmeıtinine, sondaı-aq ortalyq jáne jergilikti atqarýshy organdar jumysyndaǵy úılesimniń azdyǵyna da nazar aýdaryldy. Depýtat sonymen qatar qoqys shyǵarýdy júzege asyratyn jeke kompanııalardy baqylaý máselesin kóterdi. Onyń aıtýynsha, Ekologııalyq kodekstegi qaldyqtardy bólek jınaý týraly erejege qaramastan, kompanııalar barlyq qaldyqty bir mashınamen shyǵarýdy jalǵastyryp jatyr.
– Ákimdikter josyqsyz qyzmet kórsetýshilermen sharttardy buzýǵa, aıyppul sanksııalaryn qoldanýǵa jáne sotqa júginýge quqyly. Alaıda bul sharalar is júzinde qoldanylmaıdy, – dep atap ótti Ajar Saǵandyqova.
Onyń pikirinshe, qyzmet kórsetýshilerdiń jaýapkershiligin arttyryp, baqylaý tásilderin ózgertpeıinshe, jaǵdaıdy ózgertý múmkin emes.
Májilistegi ekologııalyq zańnamaǵa ózgerister engizý jónindegi jumys tobynyń jetekshisi retinde depýtat qorshaǵan ortany saqtaýǵa jáne eldegi ekologııalyq jaǵdaıdy jaqsartýǵa baǵyttalǵan zańnamalyq bastamalar týraly baıandady. Qazir Ekologııalyq kodeks pen Ákimshilik quqyq buzýshylyq týraly kodeks aıasynda turmystyq qatty qaldyqtardy óńdeý tásilderi qaıta qaralyp jatyr.
– Biz túbegeıli sheshimderdi talap etemiz. Bul kúrdeli zańnamalyq prosess, biraq sessııanyń sońynda jaýapkershilikti arttyratyn jáne turmystyq qaldyqtarǵa degen kózqarasty ózgertetin sońǵy sharalardy usynýymyz kerek, – dep atap ótti depýtat.
Kezdesýde depýtat polıgon qyzmetkerleriniń eńbek jaǵdaılaryn, polıgon men qaıta óńdeý ınfraqurylymyn damytý máselelerin talqylady.
Kásiporyn qyzmetkerleriniń usynystary nazarǵa alynyp, qaraý úshin Úkimetke jiberiletin boldy. Atap aıtqanda, qaıtalama shıkizatty suryptaý jáne qaıta óńdeý júıesine turǵyndar men uıymdardy tarta otyryp, qaldyqtardy bólek jınaý boıynsha pılottyq jobalardy iske qosý josparlanyp otyr.
