Rásimge Qazaqstan halqy Assambleıasy tóraǵasynyń orynbasary, Prezıdent Ákimshiligi Qazaqstan halqy Assambleıasy hatshylyǵynyń meńgerýshisi Marat Ázilhanov, Parlament Senaty men Májilisiniń depýtattary Rýslan Rústemov, Naýryzbaı Baıqadamov, Murat Ábenov, Marhabat Jaıymbetov, Murat Ergeshbaev, Aıan Zeınýllın, «QazAtomО́nerkásip» ulttyq atom kompanııasynyń basqarma tóraǵasy Meıirjan Iýsýpov, «Samuryq-Qazyna Trast» korporatıvtik qorynyń bas dırektory Alfııa Adıeva, zııaly qaýym ókilderi qatysty.
Birlik pen berekege úndeıtin ortalyqtyń ashylý rásiminde oblys ákimi Nurlybek Nálibaev jańa ǵımarat el ıgiligine qyzmet etetinin aıtyp, quttyqtaý sózin jetkizdi.
«О́ńirimizde 30-dan asa etnos ókilderi tatý-tátti ómir súredi. Assambleıa janynda 11 etnomádenı birlestik bir múdde, bir maqsat jolynda uıysyp, eldiń birligin saqtaý baǵytynda jumys istep keledi. Bereke-birligimizdiń uıytqysyna aınalyp, elimizdegi etnosaralyq dostyq pen birliktiń úlgisin álemge tanytqan Qazaqstan halqy Assambleıasynyń qurylǵanyna ótken jyly 30 jyl toldy. Búginde Assambleıa halqymyzdy birlikke, dostyqqa úndeıtin jalpyulttyq kelisimniń negizine aınaldy. О́tken jyly 1 mamyr – Qazaqstan halqynyń birligi kúni ózderińizben birge osy jerde jańa ǵımarattyń irgetasyn qalaǵan edik. Búgin «QazAtomО́nerkásip» ulttyq atom kompanııasynyń demeýshiligimen 3 mlrd 800 mln teńgege salynǵan sol Dostyq úıiniń zamanaýı ǵımaratyn el ıgiligine tabystap otyrmyz. Jalpyulttyq turaqtylyq pen qoǵamdyq kelisimniń qaınar bulaǵy – Qazaqstan halqy Assambleıasynyń 30 jyldyǵy aıasynda boı kótergen, dostyq pen kelisimniń nyshanyna aınalatyn jańa ǵımarat barshańyzǵa qutty bolsyn!» dedi N.Nálibaev.
Saltanatty rásimde birlik pen kelisimniń nyǵaıýyna eleýli úles qosqan Assambleıa músheleri men jańa ǵımaratty salǵan merdiger mekeme ókilderi Qyzylorda oblysynyń Qurmet gramotasymen, oblys ákiminiń Alǵys hatymen marapattaldy.
Ǵımaratta birlik men yntymaqty nyǵaıtýǵa atsalysqan etnomádenı birlestikter jumysyna bar jaǵdaı jasalǵan. Sonymen qatar munda oblystyq, qalalyq ardagerler keńesiniń, Azamattyq Alıans ókilderiniń de tolyq jabdyqtalǵan jumys kabınetteri bar. Qala sáýletine sán qosqan jańa ǵımarattaǵy 200 oryndyq konserttik, 50 oryndyq akt zaldarynda mádenı-rýhanı sharalar uıymdastyrýǵa bolady.
Zamanaýı ǵımarat shyǵarmashyl jastarǵa arnalǵan dombyra, án, bı úıirmeleri, medıasııa ortalyǵy, mýzeı, Assambleıa janyndaǵy ǵylymı sarapshylyq toptar jumysyna da jańasha serpin beredi.
Qyzylorda
