Foto: Senattyń baspasóz qyzmeti
Dıalog barysynda talqylanǵan tásilder Memleket basshysynyń jýyrdaǵy suhbatyndaǵy azamattardyń ómir súrý sapasyn arttyrýǵa jáne memlekettik saıasatty uzaq merzimdi nátıjege baǵyttaýǵa basa nazar aýdarylǵan negizgi oılarymen tolyq sáıkes keletini aıtyldy.
Kezdesýde elorda aýmaǵyn kezeń-kezeńmen damytý máseleleri talqylandy. Ásirese, qalanyń sáýlettik kelbetin dızaın-kod talaptaryna saı qalyptastyrýǵa, mádenı-demalys nysandary men turǵyn úı salýǵa, áleýmettik ınfraqurylymdy damytýǵa, ekologııalyq tepe-teńdikti saqtaýǵa jáne kólik júıesin jańǵyrtýǵa aıryqsha nazar aýdaryldy.
Astananyń 2035 jylǵa deıingi Bas josparyna engizilgen ózgerister jáne elordalyq aglomerasııany qalyptastyrý jobasy jeke bólim retinde qaraldy. Kezdesýge qatysýshylar osy strategııalyq qujattardy qala ınfraqurylymyna túsetin naqty júktemeni jáne halyqtyń suranysyn eskere otyryp, qalaı júzege asyrýǵa bolatynyn talqylady.
«Bizdiń maqsatymyz – Parlamentte qabyldanyp jatqan zańdardy halyqqa jetkizýmen shektelmeı, kásibı qoǵamdastyqpen birigip, aldaǵy ýaqytta qandaı zańnamalyq bastamalar kerektigin talqylaý. Elorda tez damyp jatyr, sondyqtan bul prosestiń basqarylýy jáne adam múddesine baǵyttalýy óte mańyzdy», dedi B.Jeksenbaı.
Talqylaý kezinde senator qalalyq keńistikti basqarýdyń zamanaýı ádisterin engizýdiń, jasyl ınfraqurylymdy damytýdyń jáne barlyq azamattarǵa qoljetimdi ınklıýzıvti qalalyq ortany qurýdyń mańyzdylyǵyn erekshe atap kórsetti.
Zańnamalyq ózgerister qabyldanǵan
Atap ótilgendeı, sońǵy eki jylda Parlament qalalardy keshendi damytýǵa baǵyttalǵan birqatar júıeli zańnamalyq ózgeristi qabyldady. Onyń ishinde aýmaqtardy keshendi josparlaýǵa, áleýmettik jáne ınjenerlik ınfraqurylymdy damytýǵa, ekologııalyq talaptardy kúsheıtýge baǵyttalǵan qala qurylysy qyzmeti týraly zańnamaǵa engizilgen túzetýler, sondaı-aq Jer kodeksine ózgerister engizildi.
«Qabyldanǵan normalar jer resýrstaryn barynsha tıimdi paıdalanýǵa, qoǵamdyq jáne áleýmettik nysandardy basymdyqpen damytýǵa, jer ýchaskelerin berý rásimderiniń ashyqtyǵyn arttyrýǵa múmkindik beredi. Sonymen qatar, jasyl aımaqtardy saqtaý jáne ulǵaıtý, qoǵamdyq kólikti damytý jáne qaladaǵy kólik júktemesin azaıtý boıynsha talaptar kúsheıtilip otyr», dedi senator.
Turǵyndardyń usynystary eskeriledi
Kezdesýdi qorytyndylaı kele, Bıbigúl Jeksenbaı bas jospardy aldaǵy ýaqytta naqtylaý kezinde, ásirese, abattandyrý, qoǵamdyq keńistikterdi qurý jáne áleýmettik nysandardy ornalastyrý máseleleri boıynsha elorda turǵyndarynyń usynystary men pikirlerin eskerýge erekshe mán berý qajettigin atap ótti.
