Úndistanda balalardy qutqaramyn dep otandasymyz qaza tapty

ASTANA. 24 naýryz. «Ekspress-K» gazetiniń bas dırektory Alekseı Pan Úndistannyń Goa demalys aımaǵynda qaza tapty. Bul týraly nur.kz habarlady. «Ekspress-K» basylymy bas dırektorynyń orynbasary Ádilhan Núsipov qaıǵyly oqıǵa Úndistandaǵy Goa kýrorttyq aımaǵynda oryn alǵanyn jetkizdi. Marqumnyń jubaıy habarlaǵandaı, Alekseı tolqynnyń astynda qalǵan jergilikti balalardy qutqarmaq bolypty. Ol balalardy jaǵaǵa alyp shyǵyp úlgergen. Biraq oqıǵadan keıin qatty tolqyǵan Alekseıdiń júregi kenetten toqtap qalǵan. Marqumnyń múrdesi Úndistannan Almatyǵa 25 naýryzda jetkiziledi dep kútilýde. Syrtqy ister mınıstrliginiń baspasóz qyzmeti habarlaǵandaı, qazir Úndistandaǵy Qazaqstan Elshiligi qaıtys bolǵan otandasymyzdy ákelý úshin qajetti qujattardy rásimdeýmen aınalysýda. Marqummen qoshtasý rásimi Almatyda, shamamen 26-27 naýryzda ótedi. Alekseı Pan QazMÝ-diń jýrnalıstıka fakýltetin támamdaǵan. «Ognı Alataý» gazetiniń tilshisi qyzmetin atqarǵan, «Karavan» gazetindegi jarnamalyq qyzmetti, «Eýrazııalyq ónerkásip qaýymdastyǵynda» qoǵammen baılanys departamentin basqarǵan. 2008 jyly «Ekspress-K» respýblıkalyq qoǵamdyq-saıası gazetiniń bas dırektory qyzmetine taǵaıyndalǵan. Alekseı Pan — Qazaqstannyń qurmetti jýrnalısi. Joldybaı Bazar. Derek, sýret: nur.kz.