Foto: instagram.com/janibek_alimkhanuly
«V synamasy ashyldy. Duǵada bolaıyq. Nátıjesin kútemiz», dep jazdy ol áleýmettik jelidegi paraqshasynda.
Sondaı-aq Qazaqstan kásibı boks federasııasy Jánibek Álimhanulynyń isi boıynsha B synamasyn ashý zańdy turǵydan sheshýshi kezeń ekenin jáne bul tek sportshynyń mansabyna emes, iske qatysýshy barlyq taraptyń áreketine quqyqtyq baǵa berýge tikeleı áser etetinin málimdedi. Federasııa halyqaralyq sport quqyǵynyń negizgi qaǵıdattary men proses barysynda adaldyqty jáne reglamenttiń qatań saqtalýyn talap etip otyr.
«B synamasynyń resmı nátıjeleri alynǵanǵa deıin sportshy zańdy túrde kinásiz bolyp sanalady. Aıyptaýshy sıpattaǵy kez kelgen jarııa málimdemelerdi biz prosestiń ádildigine qysym kórsetý jáne sportshynyń quqyqyn buzý dep esepteımiz. Federasııa B synamasynyń ashylýy men taldanýy bekitilgen rásimderge tolyq sáıkes júrgizilýin, sportshy men onyń ókilderiniń prosestiń barlyq kezeńine jáne nátıjelerine qol jetkizýin talap etedi. Reglamentten aýytqyǵan kez kelgen nátıje jaramsyz dep tanylýy múmkin», delingen federasııa habarlamasynda.
Raqymjan Erdenbekov bastaǵan uıym B synamasy taza dep tanylǵan jaǵdaıda barlyq aıyptaýdy resmı túrde alyp tastaýdy, sportshynyń bedelin jarııa túrde qalpyna keltirýdi jáne is barysyndaǵy áreketterge quqyqtyq baǵa berýdi suraýdy josparlap otyr.
Al buzýshylyqtar zańdy jáne dáleldi túrde anyqtalsa, federasııa reglament aıasynda sheshim qabyldamaq.
Eske salaıyq, The Ring basylymy Jánibek Álimhanuly Erıslandı Laraǵa qarsy orta salmaqtaǵy WBO, IBF jáne WBA belbeýleri úshin birikken tıtýldyq jekpe-jek aldyndaǵy dopıng-testten ótpeı qalǵanyn habarlaǵan.
Dese de otandasymyz osy aqparat taraǵannan keıin birneshe ret jekpe-jek aldynda barsha talapty saqtaǵanyn málimdedi. Sondaı-aq VADA uıymy alǵan alǵashqy dopıng-test nátıjesinde qarsy kórsetkishter anyqtalmaǵanyn aıtty.
Elimizdiń Sport jáne týrızm mınıstrligi máselege aralasyp, qajetti sharalardy oryndaý úshin otandasymyzǵa qoldaý kórsetetinin habarlaǵan.
Al belgili bapker Jumabek О́mirzaqov Jánibek Álimhanuly endi iri jekpe-jekter ótkizbeýi yqtımal ekenin aıtty.
