Aldymen depýtattar Badam aýyldyq okrýgindegi ındýstrıaldy aımaqta ornalasqan Central Asia Aluminium Company seriktestiginiń jumysymen tanysty. Bul kásiporyn alıýmınıı profılderin óndiredi. Munda 200 adam turaqty eńbek etip júr. Jobanyń alǵashqy kezeńinde 4 mlrd 400 mln teńge ınvestısııa salynǵan. Zaýytta shyǵarylatyn ónimniń basym bóligi eksportqa jóneltiledi.
Depýtattar bul óndiristi Memleket basshysy Qasym Jomart Toqaevtyń óńdeý ónerkásibin damytý, otandyq ónim kólemin arttyrý jáne eksportqa baǵyttalǵan kásiporyndardy qoldaý jónindegi tapsyrmalarynyń naqty kórinisi dep baǵalady. О́ndiristiń óńir ekonomıkasyna serpin berip otyrǵany aıtyldy.
Sapar barysynda agrarlyq salanyń múmkindikteri de nazardan tys qalǵan joq. Aýyl sharýashylyǵy men óńdeý ónerkásibin qatar damytý, agrarlyq ónimdi tereń óńdep, ishki jáne syrtqy naryqqa shyǵarý máseleleri sóz boldy. Bul baǵyt Prezıdent belgilegen negizgi basymdyqtardyń biri ekeni atap ótildi. Osy maqsattaǵy zańnamalyq jáne ınstıtýsıonaldyq sharalar «AMANAT» partııasynyń saılaýaldy baǵdarlamasynda da qamtylǵan.
Májilis depýtaty Temir Qyryqbaev óndiris pen aýyl sharýashylyǵy jobalarynyń el úshin mańyzyn atap ótti.
«О́ńirlerde iri óndiris oryndarynyń ashylýy ekonomıkany ártaraptandyrý saıasatynyń naqty nátıjesin kórsetip otyr. О́ndiris pen aýyl sharýashylyǵyn birge damytý óte mańyzdy. Parlament ınvestorlar úshin qolaıly zańnamalyq orta qalyptastyrýǵa jáne otandyq kásiporyndardyń básekege qabiletin arttyrýǵa baǵyttalǵan jumysty jalǵastyra beredi», dedi ol.
Depýtattar Shubarsý aýylynda jýyrda paıdalanýǵa berilgen 600 oryndyq Parasat jalpy bilim berý mektebine de bardy. Bul nysan «AMANAT» partııasynyń saılaýaldy baǵdarlamasy aıasynda jáne Prezıdenttiń bilim berý ınfraqurylymyn damytý jónindegi tapsyrmalaryna sáıkes júzege asyrylǵan.
О́tken jyldyń jeltoqsan aıynda ashylǵan úsh qabatty mektepte ashana, kitaphana, oqý zaly, sport jáne akt zaldary, medısınalyq pýnkt jáne zamanaýı pándik kabınetter bar. Munda 70 jýyq adam turaqty jumyspen qamtylǵan.
Shubarsý aýyly turǵyndary eń kóp shoǵyrlanǵan eldi mekenderdiń biri sanalady. Aýylda 50000 astam adam turady. Qazirgi tańda 15 mektepte 12000 astam bala bilim alyp júr. Jańa mektep osy júktemeni azaıtyp, bilim sapasyn arttyrýǵa yqpal etip otyr.
Májilis depýtaty Qaırat Balabıev bul jobanyń strategııalyq mánine toqtaldy.
«Bilim berý ınfraqurylymyn damytý eldiń bolashaǵyna salynǵan ınvestısııa. Memleket basshysynyń bastamasymen iske asyp jatqan bul jobalar aýyl men qala arasyndaǵy bilim alshaqtyǵyn azaıtýǵa baǵyttalǵan. Bul partııanyń saılaýaldy baǵdarlamasyndaǵy negizgi basymdyqtardyń biri», dedi Q. Balabıev.
Jalpy ótken jyly Túrkistan oblysynda 20 jýyq jańa mektep paıdalanýǵa berilgen. Sonyń beseýi Ordabasy aýdanynda ornalasqan. Bul óńirde áleýmettik ınfraqurylymǵa erekshe kóńil bólinip otyrǵanyn kórsetedi.
Jumys saparynyń sońynda depýtattar jergilikti kásipkerlermen, agrarlyq sala ókilderimen jáne bilim berý uıymdarynyń basshylarymen pikir almasty. Investısııalyq ahýaldy jaqsartý, aýyl sharýashylyǵy men óndiris keshenderin damytý jáne óńirlerge júıeli qoldaý kórsetý máseleleri talqylandy. Aıtylǵan usynystar aldaǵy ýaqytta Májilis qabyrǵasynda jan jaqty qaralatyn boldy.
