Keńes dáýirinde tutynýshylar odaǵynyń avtokólik garajy retinde boı kótergen bul ǵımarattyń jalpy aýdany – 448 sharshy metr. О́rt sóndirý qyzmetine arnap salynbaǵandyqtan, qyzmettik tehnıkalardyń keıbiri garajǵa syımaıdy.
Sol sebepti, qysy-jazy dalada, ashyq aspan astynda turady. Jańbyr jaýsa, qar erise ǵımarat tóbesinen sý sorǵalaıdy. Keteýi ketken nysandy jamap-jasqaǵanmen, paıda joq. Birinshiden ábden tozǵan, jóndeý shyǵyny shash-etekten. Ekinshiden, tıptik ǵımarat bolmaǵandyqtan órt sóndirýshilerge ártúrli qolaısyzdyq týǵyzady.
«Qazirgi eski ǵımaratty mamandar tekserdi, «apattyq jaǵdaıǵa taıap tur, eshqandaı jóndeý jumysy kómektespeıdi. Jańadan salǵan tıimdirek bolady eken. Jobasy daıyn, shamamen 1,5 mlrd teńgege shyqty. Jańa órt sóndirý beketi salynsa tótenshe jaǵdaı kezinde kórsetiletin kómektiń bárin qamtýǵa múmkindik týady», dedi Tarbaǵataı aýdanynyń ákimi Darhan Jórgekbaev.
Oblys ortalyǵynan shetkeri jatqan shekaralyq aımaq úshin bul nysannyń qanshalyqty mańyzdy ekenin eskergen óńir basshysy jańa órt sóndirý beketin salýǵa qoldaý kórsetetinin aıtty.
«Jaǵdaıdy kózimmen kórdim. Shynymen de ǵımarat eskirgen, tozyp tur eken. Jańasyn salý kerek. Eń birinshi kezekte adamdardyń ómiri men qaýipsizdigin qamtamasyz etip, qorshaǵan ortany saqtaýymyz qajet. Bul oraıda órt sóndirý beketiniń atqaratyn róli joǵary», dedi oblys ákimi Nurymbet Saqtaǵanov.
