1135 qylmystyq is boıynsha tergeý aıaqtalyp, jábirlenýshilerge 141,5 mıllıard teńge ótelgen. 128 mıllıard teńgeden astam qarajatty qolma-qol aqshaǵa aıyrbastaýmen shuǵyldanǵan 15 qylmystyq top pen 29 alańnyń kózi joıyldy.
Esirtki satýdan jáne alaıaqtyq jolmen tapqan aqshany jylystatqan 22 astyrtyn krıptoalmasý qyzmetine tosqaýyl qoıyldy. Esirtki tabysyn zańdastyrýǵa qatysy bar 1,1 myńnan astam zańsyz onlaın krıptovalıýta aıyrbastaý qyzmeti men 20 myń drop‑karta buǵattaldy.
Qarjy sektorynda zańsyz kiristi jylystatýmen aınalysty degen kúdikke ilikken 2 myń kompanııamen jáne 56 myń adammen iskerlik qarym-qatynas toqtatyldy.
53 ınfraqurylymdyq joba boıynsha 264,2 mıllıard teńge bıýdjet qarjysyn negizsiz shyǵyndaýǵa, taýar bırjasy basshylyǵynyń 2 mıllıard teńge zańsyz syıaqy alý shemasyna tosqaýyl qoıý arqyly áleýmettik mańyzy bar kómir baǵasynyń spekýlıatıvtik ósýine jol berilmedi.
Agenttik qyzmetkerleri kontrabandalyq jolmen shetelge 102 myń tonna benzın shyǵarý áreketin áshkerelep, janar-jaǵarmaı tapshylyǵynyń aldyn aldy.
Halyqty onlaın-kazınolardan saqtandyrý sharalary jóninde málimet berildi. Atap aıtqanda, tólem qyzmetterin usynatyn 35 uıymnyń kómegimen 2,1 trıllıon teńge qarajat zańsyz aınalymda júrgeni anyqtaldy.
Tabıǵı resýrstardy barlaý jumystaryn atqarmasa da, 437 jer qoınaýyn paıdalanýshyǵa 625 jer telimin berý, sondaı-aq 382 myń tonnadan astam zańsyz óndirilgen paıdaly qazbany shyǵarý faktileri tirkeldi.
MÁMS júıesinde kórsetilgen qyzmetterdiń sanyn qoldan kóbeıtý, sonyń ishinde qaıtys bolǵan adamdarǵa jalǵan medısınalyq kómek kórsetý arqyly 26 mıllıard teńge shyǵyn keltirý faktisi málim boldy.
Memleket basshysy agenttik qyzmetiniń negizgi baǵyttary boıynsha birqatar tapsyrma berdi.
