Foto: qais_arr
Ol zańsyz oıyn bıznesine járdemdesti degen kúdikke ilindi.
«Kúdikti 5 jyl boıy «Instagram» áleýmettik jelisinde, «qais_arr» ataýymen (2,4 mln jazylýshy) belsendi blogerlik qyzmet júrgizip, sondaı-aq «Telegram»-daǵy «Qora enterteınment» jabyq arnasyn (368 myń jazylýshy) basqarǵan. Kúdikti áleýmettik jelilerdegi jeke akkaýnttaryn paıdalana otyryp, Qazaqstan Respýblıkasynyń azamattary úshin «Pinco» saıtynda tirkelýge jáne qumar oıyndarǵa qatysýǵa baǵyttalǵan tikeleı siltemelerdi, grafıkalyq elementterdi jáne úndeýlerdi qamtıtyn beınematerıaldar men jarııalanymdardy júıeli túrde ornalastyrǵan. Sonymen qatar beınerolıkterdiń astynda paıdalanýshylarǵa bonýs beretin jeke promokodyn kórsetken», dep túsindirdi agenttik.
Osylaısha, bloger azamattardy qumar oıyndarǵa tartýǵa baǵyttalǵan onlaın-platformany jarnamalap, oıyn platformasynan syıaqylar, bonýstar nemese paıyzdyq aýdarymdar túrinde tabys alyp otyrǵan.
Zańsyz jolmen alynǵan kiristerdi jasyrý maqsatynda kúdikti krıptoámııandy paıdalanǵan. Oǵan «Pinco» ınternet-kazınosynyń uıymdastyrýshylarynan tólemder túsip otyrǵan.
Sot sanksııasymen 182 736,741 USDT kólemindegi krıptoaktıvterge tyıym salyndy.
Buǵan deıin bloger óziniń áleýmettik jelidegi paraqshasynda ózine salynǵan izdeýge qatysty pikir bildirgen edi.
