Búginde qysqy olımpıadalyq sporttyń 13 túri qatar damyp keledi. Olardyń qatarynda konkımen júgirý, short-trek, mánerlep syrǵanaý, bıatlon, kerlıng, shańǵy jarysy, taý shańǵysy, frıstaıl, snoýbord, shańǵymen qossaıys, tramplınnen sekirý, shaıbaly hokkeı jáne skı-alpınızm bar. Bul baǵyttardyń barlyǵynda ulttyq quramalar jasaqtalyp, josparly jumys júrgizilip otyr.
Sportshylardyń daıyndyǵy tek el ishindegi jattyǵýmen shektelgen joq. Quramalar shetelderde oqý-jattyǵý jıyndarynan ótip, halyqaralyq jarystarda baq synady. Tórt jyl ishinde qysqy sport túrleri boıynsha ulttyq komandalar 612 oqý-jattyǵý jıynyn ótkizse, sportshylar 434 halyqaralyq jarysqa qatysqan. Bul tájirıbe jınaýǵa da, álemdik deńgeıdegi qarsylastarmen kúsh synasýǵa da múmkindik berdi.
El sportshylary qysqy Olımpıada oıyndarynda qandaı kıim úlgisimen óner kórsetedi?
Daıyndyq sapasyn arttyrý úshin sheteldik mamandar da tartyldy. Memleket basshysynyń tapsyrmasyna sáıkes Nıderland, Polsha, Germanııa, Rýmynııa, Reseı, Belarýs, Bolgarııa jáne Slovenııa elderinen álemdik deńgeıdegi 13 jattyqtyrýshy-keńesshi jumysqa shaqyrylǵan. Olar ulttyq quramalardyń ádistemelik jáne tehnıkalyq daıyndyǵyn kúsheıtýge atsalysty.
Olımpıadalyq tórt jyldyq sıkldi qarjylandyrýǵa barlyǵy 13,3 mlrd teńge baǵyttalǵan. Qarajat respýblıkalyq jáne jergilikti bıýdjetten, sondaı-aq bıýdjetten tys jáne demeýshilik kózderden bólindi. Bul qarjy sporttyq qural-jabdyq pen kıim-keshek alýǵa, bapkerler men sportshylardyń eńbekaqysyn tóleýge, medısınalyq jáne farmakologııalyq qoldaýǵa, halyqaralyq jarystarǵa qatysýǵa jáne oqý-jattyǵý jıyndaryn ótkizýge jumsaldy.
Konkımen júgirý: 2026 jylǵy qysqy Olımpıadaǵa kimder qatysady?
Qysqy sport túrlerin damytý Memleket basshysynyń sport salasyn jańǵyrtý jáne joǵary jetistikter sportyndaǵy nátıjeni arttyrý jónindegi tapsyrmalary aıasynda júzege asyrylyp keledi. Týrızm jáne sport mınıstrligi bul baǵyttaǵy jumysty jalǵastyryp, qysqy sporttaǵy rezervti kúsheıtýge jáne bolashaq sportshylardy daıyndaýǵa basymdyq berýdi kózdep otyr.
