Sheberdiń qolynan shyqqan dúnıelerdi jurt attaı qalap alyp ketip jatady. Ásirese qamshyǵa tapsyrys berýshi kóp. Qolóner sheberi kásibine kerek shıkizatty jurttan teri jınap, ony ılep, keıin qaıystan taspa tilip ózi jasap alady.
«Al tobylǵyny kúz kezinde Torǵaıdan, Almaty jaqtan taýdan aldyramyz. Biraq Torǵaıdyń tobylǵysy men taýdyń tobylǵysynyń aıyrmashylyǵy bar. Torǵaıǵa jańbyr az jaýady, shóleıtti, ystyq bolyp keledi. Tobylǵy soǵan beıimdeledi de, shymyr bolyp ósedi. Birinshiden, dala tobylǵysynyń syrtqy qabyǵy eshqashan túspeıdi. Maı jaǵyp, otpen qyzdyrsańyz, qyp-qyzyl bolyp óz túsin beredi. Ekinshiden, ylǵaly az shóleıtti jerde óskendikten, ózegi ıneniń kózindeı ǵana bolady. Al taýdyń tobylǵysyn qyzdyrsańyz, qabyǵy túleıdi de, astynan ekinshi qabyq shyǵady. Ylǵaly mol topyraqta óskendikten, ózegi de shege syıyp ketetindeı jýan bolady», deıdi qolóner sheberi.
Aıdynnyń aıtýynsha, tobylǵyny qyzdyryp, kúıdirgen kezde erekshe ıis shyǵady. Sol ıistiń adam densaýlyǵyna da paıdasy bar bolsa kerek. Sondyqtan qazaqtyń kúbini tobylǵymen ystap jatatyny da beker emes.
«Tobylǵyny jaǵady da, tútinine kúbini tóńkerip qoıady. Al tútinniń ysyn ustap qalý úshin kúbiniń ishine qaımaq jaǵady. Ys sol qaımaqqa sińedi. Kesege qymyz quıǵanda betinde bir qara maı júredi ǵoı, sol – osy tobylǵynyń maıy. Qazir ony kóbi súzip alyp tastap jatady. Ony almaý kerek, kerisinshe dámin shyǵaryp, ıin qandyryp turyp ishý kerek. О́ıtkeni tobylǵynyń asqazanǵa paıdaly emdik qasıeti bolady. Halyqta «qymyz qyryq aýrýǵa em» degen sóz bar. Sol qyryq emniń biri tobylǵy arqyly taraıdy. Tobylǵymen ystalǵan kúbiden qymyz ishken adam eshqashan ishek aýrýymen aýyrmaıdy», deıdi sheber.
Qostanaı oblysy
