Is-sharaǵa Premer-mınıstriniń orynbasary - mádenıet jáne aqparat mınıstri Aıda Balaeva, Oqý-aǵartý mınıstri Juldyz Súleımenova, Almaty qalasynyń ákimi Darhan Satybaldy, «Sırıýs» federaldyq aýmaǵy keńesiniń tóraǵasy jáne «Talant ı ýspeh» qorynyń jetekshisi Elena Shmeleva, ǵylymı jáne pedagogıkalyq qaýymdastyq ókilderi qatysty.
«Sırıýs» mektebinde matematıka, fızıka, hımııa jáne bıologııa pánderi boıynsha kiriktirilgen baǵdarlamalar, sondaı-aq jasandy ıntellekt, ǵarysh, ınjenerııa jáne ómir týraly ǵylymdar baǵytyndaǵy pánaralyq kýrstar memlekettik jáne orys tilderinde Qazaqstan Respýblıkasynyń memlekettik bilim berý standartyna sáıkes júzege asyrylady.
Qazaqstandyq oqýshylar «Sırıýs» ortalyǵynyń baǵdarlamalaryna qazirdiń ózinde qatysýda. 2024-2025 jyldar aralyǵynda balalar «Úlken perspektıvalar» ǵylymı-tehnologııalyq baıqaýynyń jobalyq komandalarynda jumys istedi. Sonymen qatar Qazaqstan quramasy jasóspirimder arasyndaǵy IJSO-2025 halyqaralyq jaratylystaný olımpıadasynda 6 medal jeńip aldy.
Sammıtke daryndy oqýshylar men jaratylystaný-matematıkalyq baǵyttaǵy pedagogter qatysty. Sammıt aıasynda mektep pen ortalyq jobasynyń tanystyrylymy, «Sırıýs» mamandarynyń dáristeri men sheberlik sabaqtary, «Úlken perspektıvalar» baıqaýy jobalarynyń kórmesi, sondaı-aq muǵalimderge arnalǵan kýrs ótti.
Sammıt baǵdarlamasy aıasynda oqýshylarǵa arnalǵan ǵylymı-kópshilik dárister, «Sırıýs» jetekshi sarapshylarynyń sheberlik sabaqtary, matematıka jáne jaratylystaný pánderi pedagogterine arnalǵan biliktilikti arttyrý baǵdarlamasy da ótkizildi. Oqýshylar genetıkalyq jáne aqparattyq tehnologııalardyń damýymen tanysyp, kvadrokopter nemese robot qurastyryp, baǵdarlamalap kórdi, mıdyń jumys isteý erekshelikterin zerdelep, «Sırıýs» bilim berý ortalyǵynyń akademııalyq jáne ındýstrııalyq seriktesterinen usynylǵan jobalyq tapsyrmalarmen jumys istedi.
«Búgin ǵımarattyń alǵashqy kirpishi qalandy. Bul jaı ǵana sımvoldyq qadam emes, bul mekteptiń qalaı qurylatynyn aıqyndaıtyn praktıkalyq jumystyń bastalýy. Ol bilim berý baǵdarlamalaryn qalyptastyrýdan bastap oqý prosesin uıymdastyrýǵa deıingi barlyq kezeńdi qamtıdy. Joba jaratylystaný ǵylymdary men zamanaýı tehnologııalar salasyna kiriktirilgen baǵyttarǵa negizdelip, Qazaqstan Respýblıkasynyń memlekettik bilim berý standarttaryna sáıkes júzege asyrylady», - dep atap ótti Aıda Balaeva.
«Búgin biz memleketterimizdiń basshylary qoıǵan strategııalyq mindetti sheship otyrmyz. Úzdik pedagogtermen, ǵalymdarmen jáne tehnologııalyq kompanııalardyń ókilderimen birlese otyryp, Qazaqstan oqýshylarynyń talantyn damytýǵa barlyq jaǵdaı jasalǵan zııatkerlik, mazmundy jáne qaýipsiz orta qalyptastyryp jatyrmyz. Qazirgi balalar keıde tájirıbeli mamandardyń ózi qınalatyn máselelerdi sheshýge daıyn. Sondyqtan «Sırıýs» jobalyq qyzmetti damytýǵa erekshe mán beredi. Bizdiń flagmandyq jobamyz sanalatyn “Úlken perspektıvalar” baıqaýy osynyń aıqyn dáleldeıdi. Bıyl baıqaý 11-ret ótkizilip, halyqaralyq mártebe aldy», dedi Elena Shmeleva.
Sonymen qatar, Oqý-aǵartý mınıstrligi Ǵylym jáne joǵarǵy bilim mınıstrligimen birlesip Abaı atyndaǵy Qazaq ulttyq pedagogıkalyq ýnıversıteti men Qazaq ulttyq qyzdar pedagogıkalyq ýnıversıtetiniń bazasynda «Sırıýs» ýnıversıtetiniń «Ǵylymı-tehnologııalyq bilim berý kóshbasshylary» atty eki jyldyq magıstrlik baǵdarlamasyn iske qosady. Baǵdarlama daryndy balalarmen jumys isteýge, jaratylystaný jáne tehnıkalyq baǵyttar boıynsha, sonyń ishinde pedagogıkada jasandy ıntellektini qoldaný salasynda mamandar daıarlaýǵa baǵyttalǵan.
