Foto: Aqorda
«Byltyr aımaqtyń ishki jalpy ónimi 6,5 paıyzǵa ósti. Úsh jylda oblysqa 2 trıllıon teńgege jýyq ınvestısııa tartyldy. Byltyr 27 ınvestısııalyq joba júzege asyryldy.
Sonyń ishinde jańa jylý elektr ortalyǵy iske qosylǵanyn erekshe atap ótken jón. Strategııalyq mańyzy bar bul nysan tolyǵymen ınvestordyń qarjysyna salyndy. Jylý ortalyǵy aımaqtyń energetıkalyq qaýipsizdigin nyǵaıta túsedi.
Oblys turǵyndary sapaly aýyz sýmen qamtamasyz etildi.
Halyqtyń 80 paıyzy kógildir otyndy paıdalanady. Eldi-mekenderge gaz qubyryn tartý jumysy aldaǵy ýaqytta jalǵasa beredi.
Aımaqtaǵy avtokólik jolynyń sapasy jalpy jaqsy jaǵdaıda deýge bolady. Oblystyń áýe jáne temir jol júıesi de jańǵyrtylyp jatyr. Qorqyt Ata áýejaıynyń jańa termınaly ashyldy.
Qyzylorda qalasyndaǵy tarıhı ǵımarattyń biri – temir jol vokzaly kúrdeli jóndeýden ótti. Buǵan qosa, aımaqtaǵy 10 temir jol beketin jańǵyrtý jumysy bastaldy. Munyń bári oblystyń logıstıkalyq áleýetin arttyra túsedi», dedi Qasym-Jomart Toqaev.
Memleket basshysy Qyzylorda oblysynda, ásirese, áleýmettik salada jaqsy jańalyq kóp ekenin atap ótti.
«Úsh jylda osy aımaqta 34 bilim berý, 45 mádenıet jáne sport nysany salyndy. Buǵan qosa, 40 medısına nysany ashyldy. Meniń tapsyrmammen Qyzylordada 300 orynǵa arnalǵan kóp beıindi aýrýhananyń qurylysy bastaldy. Kóp uzamaı 500 oryndyq emhana jáne 200 oryndyq perzenthana salynady.
Bir sózben aıtqanda, Qyzylorda oblysy barlyq salada qarqyndy damýda. Oblystyń jaǵdaıy jalpy jaqsy dep kúmánsiz aıtýǵa bolady. Bul – ákim Nurlybek Nálibaevtyń belsendi, tabandy jumysynyń nátıjesi», dedi Memleket basshysy.
Aıta keteıik, Qyzylordada Memleket basshysy Qasym-Jomart Toqaevtyń tóraǵalyǵymen Ulttyq quryltaıdyń V otyrysy ótip jatyr.
Prezıdent Quryltaıda sóılegen sózinde Aral teńizi máselesine toqtalyp, onyń jahandyq mańyzyn atap ótti.
Al Memlekettik keńesshi Erlan Qarın Býrabaıdaǵy quryltaıdan keıin 6 zań qabyldanyp, 10 zań jumysqa alynǵanyn jetkizdi.
