Zaýyt jylyna 3 myń tonnadan astam ónim shyǵarýdy josparlap otyr. Jobanyń ınvestısııalyq kólemi 5,3 mlrd teńgeni quraıdy. Qarajatqa Italııanyń Prato qalasynda ornalasqan «Cormatex S.r.L.» zaýytynan «Cormatex Airlay» tehnologııasyna negizdelgen zamanaýı jabdyqtar men qondyrǵylar satyp alyndy.
Jabdyqtardy ornalastyrý jumystary áli júrgizilip jatyr. Soǵan qaramastan zaýyttyń bir sehy iske qosylyp, alǵashqy ónimderin shyǵara bastady. Qazir jún qabyldaý men jýý sehynda 20 adam eńbek etedi.
О́ndiris oshaǵynda qoldanylatyn Airlay tehnologııasymen jún talshyqtary jýylyp, qoqymnan tazalanyp, keptiriledi. Sodan keıin túrli qalypqa salynyp, tyǵyz ári berik materıal retinde óndiriske shyǵady. Bul ónimderdi qurylysta jylý men dybys oqshaýlaǵysh materıaldary ǵana emes, avtokólik taqtaıshalary men oryndyq qaptaǵyshtardyń, jıhaz ben kórpe, jastyqtardyń toltyrǵyshy retinde de paıdalanýǵa bolady.
Mundaı zaýyttyń ashylǵany eń aldymen óńirdegi qoı ósirip otyrǵan sharýashylyq ıelerine paıdaly ekeni sózsiz. Aqtóbe qalasyna jaqyn ornalasqan sharýashylyqtar kóktemgi qyrqymda alǵashqy ónimderin ótkizýge kelisimshart jasasyp ta úlgerdi. Solardyń biri – Alǵa aýdanynyń Úshqudyq aýyldyq okrýginde 250 bas bııazy júndi qoı ósirip otyrǵan Jandos Aqynov. Ol bes jyldan beri osy kásippen aınalysyp kele jatsa da qyrqylǵan qoı júnin ótkizetin jer tappaı qınalatynyn jasyrmady. «Jyl saıyn tonna-tonna tabıǵı taza ónim qoqysqa ketip, rásýa bolyp jatyr. Qoraǵa jınap qoıamyz. Ol jan-jaqqa ushyp, sońynda shóppen aralasyp joq bolady. Sol sebepti amalsyzdan qoqysqa aparyp tógemiz, ne órtep jiberetin edik. Keıde qoı júni jınalǵan qora órtenip kete me dep te alańdaıtyn edik. Endi mine, Aqtóbede qoı júnin paıdaǵa asyratyn óndiris orny ashylyp, qýanyp jatyrmyz. Arzan baǵaǵa bolsa da bizge ótkizgen jaqsy», deıdi sharýa.
Aldaǵy kóktemnen bastap «KazFeltec» jylyna 3 myń tonnadan astam jún qabyldaýdy josparlap, sapasyna qaraı ár kılosyna 50 teńgeden 150 teńgege deıin tólemekshi.
Kásiporyn ashylǵan kezde zaýytqa jún suryptaýshy bolyp jumysqa kirgen Erlan Jaqypov suryptaýdan ótip, tazartylǵan qoı júni osy sehta arnaýly qondyrǵyda bes ret jýylyp, keptiriletinin aıtady. Odan keıin tegistelgen taza jún qalypqa salynyp, ónim óndirý sehyna jiberiledi.
«KazFeltec» zaýytynyń bas tehnologi Erlan Ámirǵalıevtiń aıtýynsha, Cormatex Airlay jabdyqtary arqyly ártúrli ólshemdegi 20 ónim shyǵarýǵa bolady. Biraq zaýyt ázirshe úsh túrli ónim ǵana shyǵarady. Qazir Italııadan kelgen «Cormatex S.r.L.» kompanııasynyń jumysshylary qurylǵylardy iske qosyp jatyr. Zaýyt basshylyǵy aldaǵy ýaqytta jumysshylar sanyn 50-ge arttyryp, kórshi oblystardan da jún qabyldaýdy josparlap otyr.
Kásiporyn tolyq qýatymen iske qosylsa, ekologııalyq sapaly buıymdar elimizdiń óńirlerine de jiberilmek.
Aqtóbe oblysy
