Ǵylym jáne joǵary bilim mınıstri Saıasat Nurbektiń aıtýynsha, Qazaqstan bul bastamaǵa Estonııa, Sıngapýr, BAÁ, Iordanııa jáne Grekııamen qatar qosyldy.
«Qazaqstan Ortalyq Azııada alǵash bolyp jasandy ıntellektini júıeli engizýge kóshken el», dedi ol.
Mınıstr jasandy ıntellekt ustazdardyń ornyn almastyra almaıtynyn, alaıda onyń rólin kúsheıtetinin atap ótti.
«Álemde «jasandy ıntellekt ustazdardy almastyra ma?» degen suraq jıi qoıylady. Bizdiń jaýabymyz túbegeıli ózgeshe: jasandy ıntellekt ustazdy almastyrmaıdy, kerisinshe onyń rólin kúsheıtedi. Ol kúndelikti rýtınany azaıtyp, ákimshilik jáne ádistemelik júktemeni jeńildetedi, eń bastysy - muǵalimge stýdentpen tikeleı jumys isteýge, oılaýdy damytýǵa ýaqytyn kóbirek bólýge septigin tıgizedi.
ChatGPT Edu biz úshin jaı ǵana sıfrlyq ónim emes, ınfraqurylymdyq qural. Ol oqý materıaldaryn ázirleýge, kontentti bilim alýshylardyń deńgeıine beıimdeýge, keri baılanysty jaqsartýǵa, zertteý jumysyn jedeldetýge kómektesedi. Biraq pedagogıkalyq, etıkalyq jáne baǵalaý sheshimderiniń barlyǵy adam quzyrynda qalady. Bul - bizdiń basty ustanymymyz», dedi ol.
Bul jobanyń júzege asý formaty mańyzdy. Sebebi, ol Memleket basshysynyń AQSh-qa sapary barysynda qol jetkizilgen kelisimderge negizdelgen jáne memlekettik bıýdjetke salmaq salmaı, jeke qarajat esebinen qarjylandyrylady. Bul - bıznes pen memlekettiń adam kapıtalynyń bolashaǵyna birlesip ınvestısııa salýynyń naqty úlgisi.
Astanada mektep oqýshylarynyń qaýipsizdigin jasandy ıntellekt baqylaıdy
Bilim berýdiń barlyq deńgeıindegi pedagogtar, ýnıversıtetter jáne Astana hub ekojúıesi úshin usynylǵan 165 myń tegin lısenzııa jaı san nemese statıstıka emes, bul - aýqym jáne ózgeristerdiń negizgi qozǵaýshysy retinde ustazdarǵa degen senim.
«Men úshin eń mańyzdysy - biz jasandy ıntellektini qoldanýshylardy ǵana emes, oılaıtyn, oılana alatyn urpaqty tárbıeleýdi maqsat etip otyrǵanymyz. Bolashaqtyń bilimi - adam áleýetin keńeıtý. Synı oılaý, jaýapkershilik, tehnologııamen jumys isteý mádenıeti, osynyń barlyǵy eldiń básekege qabilettiligin aıqyndaıtyn negizgi daǵdylar.
Qazaqstan jedel nátıje emes, uzaq merzimdi traektorııany tańdap otyr. Búgin biz bilim berý júıemizdiń bireýge elikteýshi emes, bolashaqty qalyptastyrýshy bolýyna taǵy bir naqty qadam jasadyq», deıdi ol.
Bilim salasyna jasandy ıntellekt engizý jónindegi jumys toby quryldy
