Sýretti túsirgen – avtor
Iá, elimizdegi eń sýyq núkte – Marqakól aýdanynyń túý túkpirindegi Shanaǵaty aýyly. Azyn-aýlaq tútin qalǵan aýyldyń aıazyn el ańyz qylyp aıtyp júrgenimen, aqıqat. Bıylǵy aıaz tipten qysty. Termometr baǵanasy alpystan asty. Jergilikti jurt odan tómen san bolmady, áıtpese jetpiske de baryp qalýy ǵajap emes dep topshylady.
Aldyńǵy jyly Marqa óńirine qalyń qar túsip, el-jurttyń jaǵdaıyn suraı saparlap barǵanbyz. Sol kezde Shanaǵatynyń turǵyny Oırat Shoqaqov ertede –66 gradýs aıaz tirkelgen dep, ózi tańǵalyp otyrǵan. Dál sol aıaz, mine, bıyl qaıtalandy. Túkirik jerge túspeıtin sýyq maldy da, jandy da qınady. Tipti tehnıka tózbeıtin úskirik óńmenińnen ótedi. Onyń ústine bul jaqtyń sýyǵy aptalap turady. Aýyldy taý qorshap jatqandyqtan ba, aıazdyń beti bir demde qaıtpaıdy da. Naǵyz qys – Shanaǵatyda. Anyq-qanyǵyn kim bilsin, aýyl ataýy da tabıǵattyń tosyn minezimen baılanysty-mys. Ertede deıdi, aýyldyń bas jaǵynda aıazdy kúni shana qatyp, sodan Shanaǵaty bolyp ketken kórinedi. Keıbir zııaly qaýym Shanaǵaty da Arǵanaty sekildi ataý dep, aryǵa barǵysy kelmeıdi. Túp-tórkinin qazbalaıtyn bolsaq, biri mońǵoldyń sózi dese, endi biri qalmaqty qaıtalap júrmiz deıdi.
Qyzyǵy sol, Saha jerindegi saqyldaǵan sary aıaz bizde de bar.
Shyǵys Qazaqstan oblysy,
Marqakól aýdany,
Shanaǵaty aýyly
