Sýretti túsirgen – Valerıı Býgaev
Oblys ortalyǵynda №47 orta mekteptiń ashylýy – shahar úshin mańyzdy oqıǵa, óńirdiń bilim berý ınfraqurylymyn damytý jolyndaǵy eleýli qadam. «Keleshek mektepteri» ulttyq jobasyn iske asyrý aıasynda osymen oblys ortalyǵynda ekinshi zamanaýı mektep boı kóterip otyr. Ulttyq joba balalardyń zertteýshilik daǵdylary men shyǵarmashylyq oılaý qabiletin damytatyn jańa býyndaǵy bilim berý keńistigin qalyptastyrýǵa baǵyttalǵany málim. Al jańa ǵımarat ekinshi jaǵynan shaharda qazaq tilinde bilim alatyn oqýshy oryndarynyń tapshylyǵyn aıtarlyqtaı joıdy. Atalǵan bilim uıasynyń qurylysy 2024 jyldyń jeltoqsanynda bastalǵan edi. Jobanyń tapsyrys berýshisi – «Samruk-Kazyna Construction» AQ. Qurylysyna 3,8 mlrd teńge jumsaldy.
Memlekettik tilde bilim beretin mektep zamanaýı oqý kabınetterimen, mamandandyrylǵan zerthanalarmen, keń sport zaldarymen, kitaphanamen, oqýshylardyń sabaqtan tys is-sharalaryna, demalysyna arnalǵan aımaqtarmen jabdyqtalǵan. Jobalaý barysynda qaýipsizdik, qoljetimdilik jáne bilim berý úderisin sıfrlandyrý máselelerine erekshe kóńil bólingeni baıqalady. Oqý keńistigi ınnovasııalyq oqytý ádistemelerin engizýge, oqýshylardyń shyǵarmashylyq jáne zııatkerlik áleýetin damytýǵa beıimdelgen.
– Memleket basshysy Qasym-Jomart Toqaevtyń «Keleshek mektepteri» bastamasy aıasynda óńirimizdegi bilim berý salasyn damytý boıynsha júıeli jumystar júrgizilýde. Oblysymyzda úsh aýysymdyq oqý máselesin sheshý maqsatynda jańa bilim ordalary men mektepterge qosymsha ǵımarat salý jumystary jalǵasyp jatyr. Buǵan deıin Dostyq shaǵyn aýdanynda 1200 oryndyq mektep ashylǵan edi. Keıingi úsh jylda oblysta jańadan 10 mektep turǵyzyldy, sonyń nátıjesinde úsh myńǵa jýyq bala sapaly ári zamanaýı bilim alýda, – deıdi óńir basshysy Asaıyn Baıhanov.
Ákimniń sózinshe, aldaǵy jyldary oblys ortalyǵynda úshinshi mekteptiń qurylysy kózdelip otyr. 1200 oqýshyǵa laıyqtalǵan ǵımarat Ýsolka shaǵyn aýdanynda salynady. Qurylysy bıyl bastalyp, kelesi jyly aıaqtalýy kerek. Qazirgi kúni jobalyq-smetalyq qujattamasy daıyn.
Jańa bilim uıasynyń dırektory Láılá Júsipovanyń aqparynsha, mektep 600 orynǵa shaqtalyp salynǵanymen, qazirdiń ózinde munda 805 oqýshy partaǵa otyryp úlgergen. Oqýshylardyń kelýi áli de jalǵasyp jatyr. Soǵan oraı bastaýysh synyp oqýshylary eki aýysymmen oqıdy.
– Mektebimizdiń materıaldyq-tehnıkalyq bazasy óte keremet, barlyǵy jaqsy jabdyqtalǵan. Pán muǵalimderimen tolyq qamtylǵan, joǵary bilikti 74 ustaz sabaq beredi. Kamal Maqpaleev atyndaǵy №4 mektep pen Álıhan Bókeıhan mektebinen 4 synyp kelse, ózgelerinen 12 synyptaı keldi, – dep atap ótti bilim uıymynyń basshysy.
Jalpy, keıingi jyldary oblysta qazaq synybyn tańdaǵan oqýshylar úlesi turaqty ósip keledi. Bıylǵy oqý jylynda óńir boıynsha 11 myńǵa jýyq bala mektep tabaldyryǵyn alǵash attasa, olardyń 52,2 paıyzy qazaq synybyna barǵan. Eger 2020 jyly bul kórsetkish 35,5 paıyz bolsa, 2023 jyly – 43 paıyz, 2024 jyly 45 paıyz bolǵan edi. 2025 jyly birden 7,2 paıyzǵa artqan.
Taǵy bir jaǵymdy úrdis, jańadan ashylyp jatqan qazaq mektepterine oqýshy izdep tabý burynǵydaı kúrdeli emes. Máselen, Pavlodardaǵy «Saryarqa» shaǵyn aýdanynda 2022 jyly memlekettik tilde oqytatyn Álıhan Bókeıhan atyndaǵy mektep-lıseıi ashylǵan edi. Bilim ordasy alǵash taza qazaq tilinde bolady degende shahardaǵy orystildi qaýym shý ete túsken. «Oqýshy sanyn toltyra almaıdy, mektep aralas bolsyn» dep qarsylyq tanytyp, aqparattyq shabýyl jasaǵandar da boldy. Degenmen jergilikti bilim salasynyń basynda otyrǵan azamattar durys sheshim qabyldap, mektep memlekettik tilde ashyldy. Búginde atalǵan oqý uıasyna balalar syımaı, jańadan ashylyp otyrǵan №47 mektepke kelip jatqany sonyń dáleli. Qalaı desek te, túbinde memlekettik tildi meńgergender ozatyny sózsiz.
PAVLODAR
