Buǵan deıin ashylǵan mektepterdiń sońyn ala, ıaǵnı ulttyq jobany tııanaqtaǵan Aqtaý qalasynyń 16-shaǵyn aýdanynda ashylǵan №35 jalpy bilim beretin mektep boldy. Bul – Mańǵystaý oblysynda atalǵan joba boıynsha iske qosylǵan on úshinshi mektep.
1 500 oqýshyǵa eseptelgen jańa formattaǵy bilim berý uıymynyń jalpy aýmaǵy 15 myń sharshy metrden asady. Oqý ordasynda 77 pán kabıneti qarastyrylǵan, olardyń ishinde dızaın jáne tehnologııa, tamaqtaný mádenıeti, vızýaldy óner, úı mádenıeti, robottehnıka, STEM jáne mýzyka baǵytyndaǵy arnaıy synyptar bar. Bilim ordasy zamanaýı oqý qural-jabdyqtarymen tolyq qamtylyp, oqýshylardyń shyǵarmashylyq áleýeti men zııatkerlik damýyna qolaıly orta qalyptastyrylǵan.
Jańa bilim ordasynyń ashylý rásimine Mańǵystaý oblysynyń ákimi Nurdáýlet Qılybaı qatysyp, ustazdar men oqýshylardy jańa mekteptiń ashylýymen quttyqtady.
– Memleket basshysynyń tapsyrmasyna sáıkes óńirimizde zamanaýı úlgidegi mektepter kezeń-kezeńimen boı kóterip jatyr. Bul bastama balalardyń sapaly bilim alyp, bolashaq mamandyǵyn erterek tańdaýyna jol ashady. Jańa mektepter tek bilim berý orny emes, oqýshylardyń qabiletin ashyp, olardyń jan-jaqty damýyna jaǵdaı jasaıtyn keńistikke aınalýǵa tıis, – dedi óńir basshysy.
Mektep ǵımaratynyń taǵy bir artyqshylyǵy – erekshe bilim berýdi qajet etetin balalarǵa da beıimdelgen. Munda sensorlyq bólme, ınklıýzıvti bilim berýdi qoldaý kabıneti jumys isteıdi, sondaı-aq múmkindigi shekteýli oqýshylarǵa arnaıy jedelsaty ornatylǵan. Sondaı-aq qaýipsizdikti qamtamasyz etý maqsatynda mektep ishinde 126 beınebaqylaý kamerasy ornatylyp, aýmaǵynda balalarǵa arnalǵan oıyn jáne sport alańdary salynǵan.
Sondaı-aq «Keleshek mektepteri» ulttyq jobasy aıasynda bir jyl ishinde birneshe jańa bilim ordasy iske qosylǵan Munaıly aýdanynda úsh aýysymdy oqytý túbegeıli joıyldy.
– Úsh aýysymdy oqytýdy joıý maqsatynda «Keleshek mektepteri» ulttyq jobasy aıasynda byltyr birneshe bilim berý nysany iske qosyldy. Atap aıtqanda, Batyr aýyldyq okrýgi men «Samal», «Hazar» shaǵyn aýdandarynda 1200 oryndyq eki mektep, Mańǵystaý aýylynyń «Aıraqty» turǵyn úı massıvinde 900 oryndyq mektep, Basqudyq aýyldyq okrýginde 395 oryndyq «Bastaý» jekemenshik bastaýysh mektebi paıdalanýǵa berildi. Osy nysandardyń ashylýy arqyly aýdandaǵy úsh aýysymdy oqý máselesi tolyq sheshildi, – dedi aýdan basshysy Qanat Qúljanov.
Zamanaýı jańa mektep – oqýshy úshin jaıly jaǵdaıda alańsyz bilim alýdyń kepili. Mańǵystaýda ashylǵan jańa mektepter oqýshylar men ata-analar úshin qýanysh syılap keledi.
Mańǵystaý oblysy
