Ulttyq Bank málimetinshe, 2025 jyldyń qorytyndysynda ınflıasııa 12,3% boldy. Iаǵnı taýarlar men qyzmetter orta eseppen osy shamada qymbattaǵan. Baǵanyń ósýine eń aldymen azyq-túlik áser etken. Et pen maıdyń qymbattaýy óndiris shyǵyndarynyń artýymen jáne eksport kóleminiń kóbeıýimen baılanysty.
Ulttyq bank bazalyq mólsherleme boıynsha sheshimder kestesin bekitti
Al azyq-túlikke jatpaıtyn taýarlardyń baǵasy sońǵy aılarda birshama baıaýlady. Buǵan teńgeniń nyǵaıýy yqpal etken. Kommýnaldyq qyzmet tarıfterin ýaqytsha ustap turý da qyzmet baǵasynyń kúrt ósýine jol bermedi.
Degenmen, jyl sońynda jaǵdaı qaıta ózgerdi. 2025 jylǵy jeltoqsanda baǵa bir aıdyń ishinde 0,9%-ǵa ósti. Bul halyqtyń suranysy áli de joǵary ekenin kórsetedi. Iаǵnı adamdar kóp satyp alyp jatyr, al usynys oǵan ilese almaı otyr.
Al sarapshylar 2026 jyly ınflıasııa 10,8% deńgeıinde saqtalýy múmkin dep boljap otyr.
Syrtqy jaǵdaı da áser etpeı turǵan joq. Álemde azyq-túlik baǵasy azdap tómendegenimen, áli de qymbat. Geosaıası shıelenister kúsheıip, naryqtaǵy turaqsyzdyq saqtalýda. Munyń bári baǵanyń tez tómendeýine kedergi keltiredi.
Sonymen qatar Qazaqstan ekonomıkasy 2025 jyly 6,5%-ǵa ósti. Qurylys, kólik, saýda jáne ónerkásip salalary jaqsy damyp jatyr. Biraq ekonomıkanyń ósýi de ınflıasııany kúsheıtýi múmkin, sebebi aqsha aınalymy artady.
Ulttyq Banktiń málimetinshe, baǵany ósiretin negizgi qaýipter – janar-jaǵarmaı baǵasy, tarıfterdiń qaıta kóterilýi, bıýdjet shyǵystary jáne aldaǵy salyq reformasy. Sondyqtan qazir mólsherlemeni tómendetý erte dep eseptelip otyr.
Osy sebepterge baılanysty bazalyq mólsherleme 2026 jyldyń birinshi jartyjyldyǵynyń sońyna deıin 18% deńgeıinde saqtalýy múmkin. Al kelesi resmı sheshim 2026 jylǵy 6 naýryzda jarııalanady.
Qysqasy, Ulttyq Bank úshin basty maqsat – baǵany baqylaýda ustaý. Sol úshin nesıe qymbat bolyp qala beredi, al bul sheshim ınflıasııany birtindep tómendetýge baǵyttalǵan.
