Máselen, Almaty shaharyndaǵy táýlik boıy qaltqysyz qyzmet kórsetetin №4 qalalyq klınıkalyq aýrýhanasynyń tynysy keńeıdi. Jylyna 12 500-ge deıin kúrdeli operasııa jasaıtyn irgeli mekeme jýyrda tolyqtaı kúrdeli jóndeýden ótip, adam tanymastaı ózgerdi. Kópsalaly stasıonardy jańǵyrtý jumysynyń nátıjesinde aýrýhananyń qabyldaý múmkindigi edáýir artyp, endi bir mezette 250 emes, 450 adamǵa deıin em-dom kórsete alatyn deńgeıge jetti.
Jańarǵan ǵımarattaǵy eń mańyzdy jańalyq – halyqaralyq «Triage» júıesiniń engizilýi. Pasıentterdi suryptaýdyń bul ádisi naýqastar legin qyzyl, sary, jasyl aımaqtarǵa bólý arqyly júzege asady. Nátıjesinde, aýyr haldegi naýqastarǵa shuǵyl kómek kórsetilip, asqynýlar men ólim-jitim qaýpi seıiledi, sondaı-aq tósektik oryn qory tıimdi paıdalanylyp, stasıonarda jatý merzimi qysqarady.
Buǵan qosa medısına mekemesinde zamanaýı operasııalyq bloktar, 12 oryndyq anestezıologııa jáne reanımasııa bólimshesi, qarqyndy terapııanyń shuǵyl bólimi iske qosyldy. Teri arqyly júrek tamyrlaryn emdeý ortalyǵynyń ashylýy da – el ıgiligine jasalǵan mańyzdy qadam. Bul júrek-qan tamyrlary syrqaty bar azamattarǵa joǵary tehnologııalyq medısınalyq kómekti qoljetimdi ete túsedi.
«Memleket basshysynyń tapsyrmasyna sáıkes Almatyda halyqaralyq standarttar men zamanaýı talaptardy eskere otyryp, medısınalyq ınfraqurylymdy júıeli jańartý jumysy júrgizilip jatyr. О́tken jyly 4 alǵashqy medısınalyq-sanıtarlyq kómek ortalyǵy men 1 emhana paıdalanýǵa berildi. Sonymen qatar taǵy 32 nysandy salý, qaıta jańǵyrtý jobalary ázirlenip jatyr», dedi qala ákimi Darhan Satybaldy.
Shahardaǵy ıgi ózgerister munymen shektelmeıdi. Búginde Almatynyń «Altaı» shaǵyn aýdanynda burynǵy eski ǵımarattyń ornyna, bir aýysymda 500 adamdy qabyldaýǵa qaýqarly jańa emhananyń qurylysy qyzý júrip jatyr.
Jańa nysan ýltradybystyq zertteý apparattary, sıfrlyq flıýorografııa, mammografııa, rentgen, MRT, KT syndy ozyq dıagnostıkalyq júıelermen tolyq jabdyqtalady. Bul medısınalyq tekserýlerdiń jyldamdyǵy men dáldigin arttyryp, alǵashqy sanıtarlyq kómektiń biryńǵaı standarty aıasynda sapaly qyzmet kórsetýge múmkindik beredi. Qurylys jumystaryn bıylǵy tórtinshi toqsanynda aıaqtaý josparlanyp otyr.
ALMATY
