Foto: Konstıtýsııalyq sot
«Osyndaı sheshýshi sátte bizge asa mańyzdy mıssııa júkteldi. Bul – úlken jaýapkershilik. Búgin osy zalǵa túrli salanyń kásibı mamandary, tájirıbesi mol, elge belgili azamattar jınalǵan. Bárimizdiń maqsat-mindetimiz – ortaq.
Sondyqtan, osy aıryqsha mindetti abyroımen atqaryp shyǵamyz dep senemin», dedi E.Qarın.
Budan soń, Erlan Qarın Parlamenttik reforma jónindegi jumys tobynyń atqarǵan isine toqtaldy.
«Búgin jumysyn bastaǵaly otyrǵan Konstıtýsııalyq komıssııa – osyǵan deıin jarty jyl boıy jumys istegen Parlamenttik reforma jónindegi jumys tobynyń zańdy jalǵasy, dedi ol.
E.Qarın ótken jyldyń 8 qyrkúıeginde Memleket basshysy Joldaýynda bir palataly Parlamentke kóshý týraly bastama kótergenin tilge tıek etip, muny el azamattarynyń kópshiligi qoldaǵanyn atap ótti.
«Qazan aıynda Qazaqstannyń strategııalyq zertteýler ınstıtýty júrgizgen zertteýge súıensek, respondentterdiń 70 paıyzǵa jýyǵy osy ıdeıaǵa qoldaý bildirgen. Bir aıdan keıin 8 qazanda Prezıdent О́kimimen Parlamenttik reforma jónindegi jumys toby quryldy.
Onyń quramyna Parlamenttegi saıası partııa fraksııalarynyń jetekshileri, belgili zańger-ǵalymdar, sarapshylar men qoǵam belsendileri, Ulttyq Quryltaı músheleri endi.
14 qazan kúni Jumys tobynyń alǵashqy otyrysy ótti. Oǵan Prezıdent arnaıy qatysty. Sol otyrysta Jumys tobynyń músheleri aýqymdy ózgerister Konstıtýsııanyń birneshe bólimin qamtıtynyna nazar aýdardy. Mundaı aýqymdy túzetýler kezinde azamattardyń da pikiri eskerilýge tıis», dedi ol.
Onyń aıtýynsha, sol sebepti 14 qazanda azamattardyń usynys-pikirin jınaqtaý úshin e-Otinish jáne eGov portaldarynda «Parlamenttik reforma» degen arnaıy bólim ashyldy. Parlamentarızm ınstıtýty kelip túsken usynystardy jınaqtap, júıeleýmen aınalysqan.
Sonymen qatar bul iske Zańnama jáne quqyqtyq aqparat ınstıtýty, Strategııalyq zertteýler ınstıtýty tartylǵan. Bul qurylymdar parlamentarızmge qatysty halyqaralyq tájrıbeni bir aı boıy muqııat zerdelegen.
«Osylaısha, Jumys tobynyń múshelerine barlyq aqparat pen taldaý nátıjeleri usynyldy. Qazan aıynan beri parlamenttik reformaǵa qatysty usynystar túgel jınaqtaldy. Sonyń ishinde Jumys tobynyń múshelerine aldaǵy reformaǵa qatysty óz usynys-pikirlerin ázirleýge bir aı ýaqyt berildi.
Jumys tobynyń múshelerimen qatar, Amanat, Aýyl, Respublica, Aq jol, Qazaqstan halyq partııasy, Jalpyulttyq sosıal-demokratııalyq partııasy ózderiniń oı-pikirin daıyndap, joldady», dedi Erlan Qarın.
Eske salaıyq, elordada Konstıtýsııalyq reforma jónindegi komıssııanyń alǵashqy otyrysy ótip jatyr.
